DILI, 08 outubru 2020 (TATOLI)-Tribunál Distritál Díli (TDD kondena arguidu Casimiro Mateus Botelho ho pena prizaun efetivu tinan-lima (5) tanba faktu provadu komete krime tráfiku ilísitu droga.
Notísia Relevante : Tribunal Aplika Prizaun Preventiva ba Timoroan Simu Droga husi Nijéria
Iha leitura Juis Evangelino Belo, hateten, bazeia ba produsaun prova liuhosi deklarasaun arguidu, sasin no auto ne’ebé konsta provadu hotu, katak arguidu simu duni sasán pakote kompresór AC karreta nian tau droga iha laran ne’ebé autoridade Alfándega prende sasán pakote ne’e iha loron 7 janeiru 2019, iha Aero Portu Internasionál Prezidente Nicolau Lobato, Dili no ai-moruk droga ne’e arguidu simu hosi Nijerianu ida ho naran Valentin Okpagu.
Faktu provadu mós katak liuhosi relatóriu teste hosi Polísia Judisiária Portugál pozitivu ho tipu sabu-sabu methamphetamine 3. 253 kg.
Tribunál mós konsidera arguidu iha intensaun duni atu simu sasán pakote ne’e mézmu nia destinasaun finál iha Indonézia.
Tribunál deside absolve arguidu hosi krime agravasaun iha artigu 9 no tribunál deside aplika pena tinan-lima, ho artigu 7 kona-ba tráfiku atividade ilísita, hosi lei númeru 02/2017 25 janeiru, kona-ba kombate tráfiku ilísitu ba droga.
Ikus liu kona-ba sasán ne’ebé autoridade polísia prende hanesan osan $600,00 ne’ebé arguidu simu hosi Nijerianu, telemovel ho marka OPPO F11, kartaun sim sei a-favor ba Estadu, tanba sasán sira-ne’e mak fasilita arguidu kontaktu ho Nijerianu, maibé pasaporte mak sei entrega fali ba arguidu.
Jornalista : Nelson de Sousa
Editór : Francisco Simões
