Xefe Estadu Maiór Jenerál F-FDTL Majór Jenerál, Lere Anan Timur ho Embaixadóra EUA mai Timor-Leste, Kathleen Fitzpatrick konversa ho komandante F-FDTL sira iha Komandu Terrestre Baucau. Imajen Tatoli/Eugénio Pereira

BUACAU, 19 outubru 2020 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur, dezafia Primeiru-Ministru, Taur Matan Ruak, aselera implementasaun projetu konstrusaun Aeroportu Sahe, Munisípiu Baucau.

Notísia Relevante : Reabilita Aeroportu Baucau, EUA Hala’o Ona Konsulta Internu

Fundu ba projetu konstrusaun aeroportu ne’e ho totál millaun $10 ne’e hetan aprovasaun ona hosi Governu Estadus Unidus Amerika (EUA).

Jenerál Lere afirma, Amerika rasik aseita pedidu konstrusaun ne’e, hafoin nia parte ho inisiativa hala’o reuniaun ho Komandante Indo-Pasífiku Estadus Unidus Amerika (EUA), Almirante Phill Davidson, iha 2018 hodi husu kooperasaun tékniku militár atu EUA ajuda Timor-Leste.

“Ha’u sei ko’alia ho governu hodi aselera projetu ne’e,” Jenerál  Lere afirma iha ninia diskursu durante enserramentu ezersísiu “Harii Hamutuk” iha Komandu Komponente Terrenu F-FDTL, Baucau.

Lere husu ba Governu Amerika atu labele duvida ho implementasaun projetu ne’e, tanba nia parte ko’alia ona ho Xefe Estadu, Francisco Guterres Lú-Olo no Primeiru-Ministru Taur Matan Ruak, hodi haree implementasaun projetu ne’e tuir kooperasaun tékniku militár nian.

“Dala ruma Amerika laran rua-rua haree projetu ne’e halo ka la halo. Ha’u dehan ba Embaixadóra, ita militár ne’e ita la’o ba oin nafatin bazeia ba ita nia kooperasaun tékniku militár, dala ruma polítiku sira la komprende saida maka kooperasaun militár fó ba ita. Planu Aeroportu Baucau, ha’u rasik maka ko’alia ho Komandante Indo-Pasífiku EUA, Almirante Phill Davidson, bainhira ami rua hala’o reuniaun,” Lere tenik.

Komandante F-FDTL espera Governu Timor-Leste sei foti desizaun ida pozitivu liu hosi reuniaun Konsellu Ministru atu aprova implementasaun projetu ne’e. Tanba Governu Amerika prontu oferese tan aviaun ki’ik ba komandu F-FDTL.

“Ha’u entrega ba governu maka sei deside, tanba aeroportu ne’e ba Timor-Leste tomak, tanba iha Timor-Leste iha Aeroportu, Oe-Cusse, Dili no Suai ki’ik labele simu aviaun boot, tanba ne’e harii Aeroportu Baucau atu bele simu aviaun boot,” Lere afirma.

Iha fatin hanesan, Embaixadóra EUA mai Timor-Leste, Kathleen Fitzpatrick dehan, Governu Amerika iha nafatin prontidaun hodi implementa projetu ne’e.

“Ami prontu nafatin atu halo konstrusaun, maibé ami hein desizaun tomak hosi Governu Timor-Leste, ami apoiu de’it tékniku enjeñeiru sira hodi apoiu F-FDTL,” Kathleen Fitzpatrick hateten.

Projetu ne’e sei hahú hosi prosesu konstrusaun moru aeroportu, hadi’a hangar (aviaun nia para fatin), inklui konstrusaun no apoiu ekipamentu ba ekipa Bombeiru nian no apoia aviaun ida ba Komandu F-FDTL.

Embaixadóra Kathleen dehan, bainhira konstrusaun ne’e hahú sei envolve ekipa enjeñaria hosi Forsa Amerika inklui Forsa enjeñaria F-FDTL nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here