Vise Sekretariu Adjuntu Interinu Defeza EUA ba Asia no Sudeste Asiatiku, Chris R. Johnstone. Imajen Tatoli/António Goncalves

DILI, 25 outubru 2019 (TATOLI)–Vise Sekretáriu Adjuntu Interinu Defeza Estadus Unidus Amérika (EUA) ba Ázia Meridionál no Sudeste Aziátiku, Chris R. Johnstone, deklara, EUA iha nafatin kometimentu apoia dezenvolvimentu setór defeza Timor-Leste.

Notísia Relevante : EUA-TL Diskute Meiu Fortifikasaun ba Kooperasaun Defeza

Chiris informa asuntu ne’e, durante hamutuk ho Embaixadóra EUA mai Timor-Leste, Kathleen M. Fitzpatrick hala’o enkontru ho Ministru Interior Interinu, Filomeno da Paixão de Jesus, iha Kuartél Jerál F-FDTL, Fatuhada, Dili, kinta (24/10/2019).

Chris dehan, país rua fiar iha importánsia hosi kooperasaun multilateralismu no EUA fó apoiu ba adezaun Timor-Leste iha ASEAN. Timor-Leste ho EUA estabelese relasaun bilaterál ne’ebé kle’an no hakarak kontinua relasaun ne’e ba futuru.

Nia dehan, agora daudaun lideransa EUA sira mós halo ona konsultasaun interna hodi apoiu fundus reabilita Aeroportu Munisipiu Baucau nia.

“EUA komprometidu koopera ho Timor-Leste hodi reabilita Aeroportu Baucau, agora parte EUA sei hala’o hela konsulta internu ho Kongresu Amerikanu,” afirma Chris.

Chris Johnstone husu mós apoiu ba Timor-Leste hodi endorse inisiativa internasionál balu ne’ebé EUA promove hela. Nune’e, Ministru Filomeno responde katak, Timor-Leste toma nota pedidu sira ne’e no sei estuda hamutuk ho instituisaun relevante seluk molok foti desizaun final.

Ministru Filemeno hatutan, Timor-Leste nu’udar país ki’ik ne’ebé fiar iha multilateralismu kontinua hakbelun ho país oioin iha mundu no EUA nu’udar país belun Timor-Leste, sei hametin liután relasaun ho país amigo ne’e.

“Dezafiu ne’ebé mundu enfrenta ne’e kompleksu no multidimensional, tanba ne’e, país sira presiza kria kooperasaun no parseria atu bele buka solusaun ba dezafiu komún sira ne’ebé rejiaun no mundu enfrenta,” Ministru Filomeno da Paixão de Jesus hateten.

Ministru Defeza akresenta katak kapasitasaun ba F-FDTL no funsionáriu sivíl iha Ministériu Defeza ne’e sai nu’udar programa prioritária, tanba ne’e agradese tebetebes EUA ba prontidaun hodi kontinua simu Timoroan sira ba frekuente kursu ka formasaun iha Amérika.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here