Diretór ESTV 28, Pedro da Silva Ximenes. Imajen/Rafy Belo

DILI, 19 outubru 2020 (TATOLI)–Diretór Eskola Ensinu Sekundáriu Tékniku Vokasionál Indústria no Teknolojia (TECVOC-IT) 28 Novembru Becora, Pedro da Silva Ximenes, informa to’o oras ne’e, eskola refere sei hasoru difikuldade hanesan menus profesór no falta ekipamentu laboratóriu, biblioteka, sala eskola no bee-moos.

“Ita laiha moru eskola ho portaun ida seguru atu garante seguransa ida di’ak ba eskola ne’e, tanba komunidade utiliza sala aula eskola nian hodi soe fo’er ema nian,” Ezekutivu Eskola Tékniku Vokasionál ne’e relata kestaun ba jornalista-sira iha ninia kna’ar fatin Becora, segunda ne’e.

Notísia Relevante:2021, MEJD sei investe ba eskola tékniku vokasionál sira

Nia esplika loron-loron estudante-sira tenki hamoos fo’er ne’ebé maka komunidade soe arbiru ho obrigatoriamente antes tama aula hodi partisipa prosesu aprendizajen.

Kona-ba bee-moos, nia dehan, durante implementasaun Estadu Emerjénsia, eskola ne’e sempre sosa bee-moos hodi fasilita estudante no profesór-sira hodi fase liman tanba eskola ne’e laiha bee-moos.

Nune’e mós enfrenta menus ekipamentu laboratóriu ba estudante atu halo prátika, biblioteka no seluk tan.

Eskola ne’e ho totál estudante hamutuk 456, kompostu husi feto 110 no mane 346, ho ninia profesór 45, kontratadu 16 no permanente 29.

“Loloos ne’e kada departamentu ida iha matéria espesífika ne’e iha haat tanba profesór la sufisiente entaun ita halo jestaun seluk profesór ne’ebé la’ós hanorin iha departamentu obrigasaun tenke taka hotu displina sira-ne’e,” nia hateten.

Eskola Ensinu Sekundáriu Tékniku Vokasionál Indústria no Teknolojia (TECVOC-IT) 28 Novembru Becora iha Departamentu Artegráfika, Elektrónika, Eletrisidade no Informátika.

Hatán ba problema ne’e, iha Becora Dili, segunda ne’e, Ministru Edukasaun Juventude no Desportu (MEJD), Armindo Maia, hateten Governu sei investe  maka’as atu dezenvolve eskola tékniku vokasionál sira liliu rekursu umanu no fasilidade iha tinan 2021.

Notísia Relevante: Estudante Tékniku Vokasionál Becora na’in 99 partisipa PAP

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here