Presidente Institutu Nasionál Seguransa Sosiál (INSS) Longuinhos Armando. Imajen/Tatoli Egas Cristovao

DILI, 17 outubru 2020 (TATOLI)–Prezidente Administrasaun Institutu Nasionál Seguransa Sosiál (INSS), Longuinhos Armando Leite, informa katak sistema kontribuisaun fakultativa asegura traballadór naun formal no traballadór ne’ebé mak para ona nia servisu.

Notísia Relevante: INSS iha sistema kontribuisaun fakultativa ba ema ne’ebé la’ós funsionáriu

“Estabelesementu sistema kontribuisaun fakultativa iha INSS tanba atu asegura no proteje ita-nia traballadór naun formal no mós ba ema ne’ebé mak para ona nia servisu ka nia patraun hapara nia kontratu servisu nian,” dehan Prezidente INSS, Longuinhos Armando Leite, ba Agência TATOLI iha nia knaar fatin MSSI Caicoli, Dili, foin lalais ne’e.

Longuinhos hateten, se bainhira traballadór serbisu nafatin mak nia para servisu maibé nia (traballadór) hakarak kontinua nafatin halo kontribusaun, bele kontinua nafatin maibé 10% ne’e, nia na’in mak tenke selu hotu ona.

“Ita bele dehan nia na’in mak patraun ba nia-aan, ne’e mak ita bolu sistema kontribuisaun fakultativu,” nia esplika.

Tuir nia, depende  nia na’in mak hateten tanba nia hakarak asegura nia-aan no nia oan sira-nia futuru. Tanba, tuir loos ne’e sistema kontribuisaun fakultativa ne’e estabelese ba ema ne’ebé mak servisu mak para ona. 

Entaun, nia dehan, loke ba sira para kontinua kontribui maibé iha ema ne’ebé hanesan traballadór naun formál sira hanesan halo negósiu kiik hanesan tunu-sate sira mós bele karik nia hakarak rejistu iha sistema fakultativa.

“Ita loke sistema fakultativa ba traballadór ne’ebé mak para ona nia servisu tanba ema ne’e iha NISS tanba ne’e mak ita hakarak fasilita hodi sira kontinua kontribui no futureu seguransa sosiál sei proteje nia no nia oan sira,” nia hateten.

Longuinhos informa, ema hirak ne’ebé mak durante ne’e rejistu iha sistema kontribuisaun fakultativa hamutuk 704 ona tanba seguransa sosiál ne’e bele proteje ema-nia moris iha futuru.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here