Tekniku Juridiku INSS, Zeferino da Costa Bobo. Imajen Tatoli/ Egas Cristóvão

DILI, 12 outubru 2020 (TATOLI)–Tékniku Jurídiku Instituisaun Nasionál Seguransa Sosiál (INSS), Zeferino da Costa Bobo, hateten INSS iha sistema kontribuisaun fakultativa ba ema sira ne’ebé la servisu no iha inisiativa hakarak kontribui ba seguransa sosiál, mezmu ema ne’e lá servisu iha instituisaun Estadu ka empreza ruma.

“Ita-nia sistema kontribuisaun fakultativa iha INSS ne’e fó benefísiu ba ita-nia komunidade ne’ebé hetan rendimentu boot liuhosi sira-nia negósiu ka servisu agrikultór nian mezmu diferensa hosi funsionáriu públiku sira,” dehan Zeferino da Costa Bobo ba Agencia TATOLI hafoin halo sensibilizasaun kona-ba Segurnasa Sosial nian ba funsionáriu Agência TATOLI iha salaun Borja da Costa, Farol, Dili, segunda ne’e.

Zeferino Bobo esplika, prosesu kontribuisaun hanesan maibé diferensa mak servisu ho nia rendimentu inklui kontribuisaun 10%, tanba funsionáriu nian ne’e 4% hosi funsionáriu ka traballadór rasik no 6% mai hosi instituisaun ne’ebé mak nia servisu ba. Kontráriu ho ema ne’ebé mak la servisu, nia hateten, tanba 10% mai hosi traballadór hotu.

Nia hateten, bainhira ema ida mak kontribui ona ba seguransa sosiál mak aban bainrua nia sei hetan pensaun haat (4) no subsídiu neen (6) liuhosi sistema kontribuisaun fakultativa Seguransa Sosiál nian.

Jornalista tatoli dadalia ho Tekniku Juridiku INSS, Zeferino da Costa Bobo. Imajen Tatoli/ Egas Cristóvão

Pensaun haat (4) ne’e mak hanesan pensaun reforma, pensaun invalidéz iha rua mak relativa ho absoluta, no pensaun sobrevivensia. Nia esplika, subsídiu iha neen (6) mak subsídiu mate, maternidade, risku klíniku, abortu, paternidade no adosaun.

“Prosesu ne’ebé mak ita aplika ba sistema kontribuisaun fakultiva mak ita ba foti formuláriu ka formatu iha seguransa sosiál prenxe no anexa ho kartaun eleitorál no sertidaun RDTL depois ita eskolla tabela ne’ebé mak lei define tiha ona,” nia hateten.

Iha tabela ne’e, nia dehan, iha  eskandalu 10 ne’ebé kiik liu mak $6 ne’ebé hanesan ho fulan ida $60 no boot liu mak $30 fulan ida $300.

“Maibé konta ona ho 10%, mak 4% maihosi traballadór no 6% ne’e nafatin hosi nia rasik tanba nia la servisu iha instituisaun ruma mak nia tenke responsabiliza hotu. Tanba, bainhira ema ida kontribui ona ba seguransa sosiál mak nia sei hetan pensaun hanesan funsionáriu públiku sira seluk,” nia dehan.

Tuir nia, dadus ne’ebé mak iha INSS katak ema ne’ebé mak rejistu ona iha sistema kontribuisaun fakultativa besik ema na’in-704 maske gráfika dadus sistema fakultativa iha INSS sei tun-sae.

Entretantu, nia informa, to’o agora INSS seidauk halo sensibilizasaun kona-ba seguransa sosiál ba komunidade iha suku no aldeia sira.

“To’o agora ami seidauk halo sensibilizasaun kona-ba sistema kontribuisaun fakultativa seguransa sosiál nian iha munisípiu sira hotu hanesan suku no aldeia. INSS labele halo sensibilizasaun tanba pandemia COVID-19 ne’ebé mak limita atividade hotu-hotu,” nia hateten.

Mezmu INSS seidauk halo sosializasun, nia dehan, Tékniku Jurídiku INSS husu ba komunidade karik rona informasaun kona-ba benefisíu hosi kontribuisaun fakultativa seguransa sosiál atu aplika, nune’e aban bainrua bele hetan pensaun haat (4) ho subsídiu neen (6) hosi seguransa sosiál.

Jornalista: Osória Marques

Editór: Cancio Ximenes

2 KOMENTÁRIU

  1. Obrigado ba informasaun ida nee maibe Ami trabailhador sujere sei bele halo sinsiblizasaun ba programa ida neee atu nunee trabailhador sira mos bele komprende ba programa refers obrigado

  2. Iha Yunani, mosu krize ekonomia no ikusmai governu deside hodi foti osan husi Seguransa Sosial atu sustenta makina estadu. Espera ida ne’e la akontese iha Timor. Maske nune’e iha rumoris katak governu foti ona osan balu husi seguransa sosial ba selu subsidiu 100 dolar iha fulan hirak liu ba

HAKEREK NO HATÁN

Please enter your comment!
Please enter your name here