DILI, 14 outubru 2020 (TATOLI)-Programa Dezenvolvimentu Nasaun Unidu (UNDP-sigla inglés), iha tersa (13/10) entrega tan ekipamentu prevensaun COVID-19 hamutuk item 34 ba Ministériu Saúde no rai ona iha Armazén SAMES Kampung-Alor Dili.
Diretór Ezekutivu Servisu Autónomu Medikamentu no Ekipametu Saúde (SAMES), Santana Martins, informa ekipamentu hirak ne’e kompostu husi vestidu sirúrjia ba ekipamentu protesaun pesoál, 130.000, ventiladór 40, luvas 116.000, máskara 24.480, reazente hamutuk 30 no seluk tan.
Notísia Relevante :UNDP entrega ona ekipamentu COVID-19 ho valór osan millaun $ 4.6
”Kuatidade ne’e iha oin-oin hanesan vestidu karik iha medida oioin no númeru ne’ebé la hanesan no iha sira seluk ne’e ba item laboratóriu nian,” Diretór SAMES Santana Martins informa informasaun ne’e ba Tatoli iha ninia servisu fatin, kuarta ne’e.
“Kuaze sasán sira ne’ebé mak UNDP sosa ne’e maioria mai hotu ona tanba durante ne’e Sames rejista orsamentu ho valór $ 4.251.843 ne’ebé mak SAMES simu. No ohin mós sasán balun tama nafatin no tempu badak sasán balun sei mai tan espera katak fulan-novembru sasan tama hotu ona mai iha SAMES,” nia hateten.
Entretantu, antes ne’e Governu liuhosi Ministériu Saúde aprova osan millaun $5.7 ba UNDP hodi sosa ekipamentu prevensaun COVID-19.
Notísia Relevante :UNDP entrega ona ekipamentu COVID-19 Item 33 ba MS
Jornalista : Felicidade Ximenes
Editór :Agapito dos Santos