Ministerio Saúde ho UNDP halo Konferensia Imprensa relasiona kona-ba ekipamentu medikamentu COVID-19,iha Kampaun Onu Caicoli. Tersa (18/08). Imajen/Egas Cristovão

DILI, 18 agostu 2020 (TATOLI)-Programa Nasaun Unida ba Dezenvolvimentu (UNDP-sigla inglés) oras ne’e entrega ona ekipamentu médiku,  ekipamentu protesaun pesoál  ba prevensaun COVID-19 inklui  ai-moruk esensiál ba moras kritiku ho valór osan millaun $ 4.6 ba Ministériu Saúde.

Governu Timor-Leste liuhosi Ministériu Saúde aprova osan millaun $ 5.7, no oras ne’e UNDP gasta ona millaun $ 4.6 hodi sosa ekipamentu prevensaun COVID-19 inklui ai-moruk esensiál seluk, fasilidade hirak ne’e  balun  entrega ona ba Governu.

Notísia Relevante :UNDP Entrega Fasilidade Prevensaun COVID-19 Faze Daruak ba Governu

No osan adisionál millaun $  1.1 mak sei iha prosesu akizasaun nia laran  atu sosa ekipamentu espesífiku hanesan monitór ba pasiente no ekipamentu ba labarik nian.

”Iha totál kuaze  millaun $ 4,6 ba ai-moruk esensiál sira, Ekipamentu Protesaun Individuál (EPI) no ekipamentu médiku sosa ona iha fulan-Agostu maioria haruka ona balun no balun sei iha dalan,” informa Reprezentante UNDP iha Timor-Leste, Tuya Altangerel, durante konferénsia imprensa  iha Kampaun UN Caicoli, tersa ne’e.

Tipu medikamentu esensiál 42 hanesan Amoxicilina, Dexametasona no Zinco, tipu Ekipamentu Protesaun Individual EPI ba COVID-19 hamutuk 23, ekipamentu médiku, inklui 45 ventiladór 45, máskara surjiku 200.000, máskara N95 300.000, ókulu seguransa  no protetór oin 10.000, oxímetru ba pulsu 100.

Ekipamentu teste COVID-19 hanesan reajente PCR hamutuk 10.000.000,  no 25.000 kolesaun nu’udar parte akizisaun.“Maioria entrega ona ba Ministériu saúde no balun sei iha alfandega,” tenik tan.

Iha loron 29 fulan-maiu, UNDP entrega ona fasilidade balun liuhusi Ministériu Negósiu Estranjeiru no Kooperasaun (MNEK) no Servisu Autónomu Medikamentu no Ekipamentu Saúde (SAMES), no iha loron 09 fulan-jullu ekipamentu foun balun tama  tan iha Portu Dili no daudaun ne’e sei hein lisensa husi Autoridade Alfandega.

”Ekipa sosa sasán globál PNUD (iha Genebra no Copenhague, Bangkok, Pequim) foti sasán ho kualidade garantida husi nasaun hirak iha Europa no Ázia, inklui Reinu Unidu, España, França, Áustria, Itália, Koreia  Súl,” tenik tan.

”Kooperasaun husi parte hotu la’o diak tebes no aumenta ona kapasidade autoridade saúde lokál iha jerál, nune’e mós hanesan resposta ba pandemia ne’ebé la’o daudaun,” hateten tan.

Iha fatin hanesan Diretór Apoiu Nasionál Ospitalár no Emerjénsia, Nilton da silva, hateten prosesu inísiu Estadu Emerjénsia to’o agora  simu  ona ekipamentu mai ho aviaun no roo tama dala tolu ona, dahuluk sira lori medikamentu, daruak ekipamentu médiku inklui ventiladór lima husi totál 45 ne’e no ventiladór 40 mak iha hela Alfandega sei halo inspensaun.

Notísia Relevante :UNDP entrega ona ekipamentu COVID-19 Item 33 ba MS

Hafoin ramata inspesaun, UNDP sei lori ekipamentu ne’e bá rai iha armazén SAMES Kampung-Alor Dili hodi nune’e Ministériu Saúde bele halo distribuisaun ba Sentru Saúde, Ospitál Refer’al no Nasionál.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here