Inan-feton Rosália Prisca hosi aldeia Ana-hun, suku Odomau, Postu Administrativu Maliana, Munisípiu Bobonaru, halo nia atividade tuku fatuk. Imajen/António Gonçalves.

Aileu, 15 outubru 2020 (TATOLI)–Administradór Munisípiu Aileu, João Tilman do Rêgo, hateten Governu tenke fó apresiasaun ba feto rurál hotu-hotu iha munisípiu 12 inklui Rejiaun Administrativa Espesiál Óe-Cusse Ambeno (RAEOA) tanba feto rurál iha papél importante tebes ba prosesu dezenvolvimentu iha Timor-Leste. 

Notísia Relevante: Xefe Governu rekoñese papél feto rurál importante ba dezenvolvimentu nasionál

Administradór Munisípiu Aileu, João Tilman do Rêgo. Imajen TATOLI/Osória Marques.

“Governu tenke fó onra no fó apresiasaun ba feto rurál hotu-hotu iha munisípiu 12 inklui Rejiaun Administrativa Espesiál Óe-cusse Ambeno (RAEOA). Ita Ita apresia hodi suporta tomak hosi maluk mane sira liuliu mane rurál sira tanba feto rurál nia papél importante ba prosesu dezenvolvimentu iha nasaun hotu-hotu liuliu iha nasaun doben Timor-Leste,” dehan João Tilman do Rêgo iha ninia intervensaun iha ámbitu selebrasaun Loron Internasionál Feto Rurál ne’ebé hala’o iha Postu Administrativu Laulara, Munisípiu Aileu, kinta ne’e. 

Tanba, nia hateten, feto mesak de’it sei labele hetan susesu tanba bainhira mane la suporta ba feto nia atividade entaun buat hotu-hotu labele la’o.

Entretantu, Prezidente Komisaun Organizadora, Alex Santos, hateten eventu ba selebrasaun ne’e realiza tanba hetan suporta hosi Governu inklui organizasaun sosiedade sivíl hanesan Plan Internasional, Komisaun SADIA, CDC, GAKPR no Hafoti. 

Nia informa, eventu selebrasaun Loron Internasionál Feto Rurál ne’e aloka orsamentu hamutuk rihun $20-resin. Osan ne’e, tuir nia, kobre ba atividade hotu-hotu ne’ebé mak hala’o iha selebrasaun ne’e inklui kobre transporte, konsumu (konsumsi) no halo mobilizasaun ba suku neen (6) iha Postu Administrativu Laulara nian.

Notísia Relevante: Estadu presiza fó atensaun ba programa promosaun no igualdade jéneru

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here