Primeiru-Ministru, Taur Matan Ruak, hamutuk ho inan-feton iha rurál. Imajen/Mídia GPM

DILI, 15 outubru 2020 (TATOLI)–Iha loron mundiál feto rurál, Primeiru-Ministru, Taur Matan Ruak, rekoñese feto rurál nia pápel importante tebes iha prosesu dezenvolvimentu nasionál.

Organizasaun Nasaun Unida (ONU) adota loron 15 outubru nu’udar loron mundiál ba feto rurál ho objetivu atu valoriza sira-nia papél ba dezenvolvimentu rurál hodi kontribui ba moris-di’ak família.

“Ha’u saúda inan-feton rurál hotu, ba imi-nia papél importante iha prosesu dezenvolvimentu nasionál,” Xefe Estatu dehan liuhosi nota ofisiál ne’ebé Agência Tatoli asesu, kinta ne’e.

Iha loron espesiál ida ne’e, Xefe ezekutivu felisita feto rurál sira.

“Lori VIII Governu Konstitusionál nia naran no ha’u-nia naran rasik, kongratula inan-feton rurál sira iha Timor-Leste laran tomak,” Taur hateten.

Atu dignifika inan-feton sira iha área rurál, Governu liuhosi Sekretaria Estadu Igualdade no Inkluzaun (SEII) ho apoiu hosi parseiru sira no organizasaun feto, promove ona polítika ida ba empoderamentu feto rurál hodi garante edukasaun inklusiva ho kualidade, hasa’e a kapasidade desizaun, nune’e bele kontribui ba ekonomia rurál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here