Logo UNTL.

DILI, 15 outubru 2020 (TATOLI)-Ministériu Ensinu Superiór Siénsia no Kultura (MESSK) liuhosi Komisaun Asesu Engresu Ensinu Superiór no Kultura (KAEES) iha loron 13 fulan-outubru ne’e hahú halo ona prosesu inskrisaun faze dahuluk ba estudante foun atu asesu vaga iha Universidade Nasionál Timor Lorosa’e (UNTL) no Institutu Politékniku Betano (IPB).

Komisaun Asesu Engresu Ensinu Superiór komesa ona prosesu inskrisaun ne’e ho rejime tolu maka rejime oportunidade, hakbi’it (ba oan ki’ak) no veteranus nia-oan ne’e ne’ebé hala’o iha Munisípiu 12 inklui Rejiaun Administrativa Oe-Cusse Ambeno (RAEOA).

Notísia Relevante :Governu oferese vaga 910 ba oan kiak asesu UNTL

Diretora Jerál Ensinu Superiór no Siénsia, Maria Filomena Lay, informa data inskrisaun ne’e hahú iha loron 13  no sei ramata iha 23, fulan-outubru 2020.

“Tinan ida ne’e númeru ba rejime veteranus nia-oan sira atu asesu ba UNTL no IPB ne’e purvolta 650. Portantu kada Munisípiu sei foti ema na’in 50, agora ba rejime hakbi’it (oan ki’ak) dadus ne’ebé propoin husi Ministru (MESSK-red) ho totál 500, maibé kuantidade ba kada munisípiu mak ami sei haree,” Ezekutiva ne’e dehan ba Tatoli, iha ninia servisu fatin Colmera Dili, kuarta (14/10)

Nia dehan hafoin KAES ramata prosesu inskrisaun iha Territóriu Timor-Leste, sei kontinua kedas ho teste ba kandidatu sira iha loron 23 to’o 26 fulan-novembru 2020.

“Ita hein katak oan sira ne’ebé sei hakat ba ensinu superiór ne’e hakat duni ho méritu tanba ensinu superiór la’ós eskola bázika no sekundária. Tan ne’e ita hein katak ho rejime tolu ne’e bele hadi’a liután kualidade ensinu superiór iha rai laran no hadi’a mós ita nia rekursu umanu ne’ebé mak asesu ba Instituisaun ensino superiór rua ne’e(UNTL no IPB),” nia hateten.

Kritéria atu hetan rejime veteranus nia oan maka, dahuluk kandidatu tenki justifika katak nia oan rasik husi veternus, iha dokumentu pre-inskrisaun husi Komisaun Omanajen no dokumentu ne’e rasik tenki asina husi komisáriu kada munisípiu, aprezenta dokumentu komprovativu husi inan-aman katak kandidatu ne’e oan husi veteranu no kritéria seluk tan.

Ba rejime hakbi’it (oan ki’ak), nia dehan presiza hetan karta deklarasaun husi Ministériu Solidaridade Sosiál no Inkluzaun katak kandidatu ne’e maihosi família kbi’it la’ek.

Aleinde ne’e, Governu liuhosi MESSK mós sei fó rejime espesiál ba Polisia Nasionál Timor-Leste (PNTL), FALINTIL Forsa Defeza Timor-Leste (F-FDTL), Rejime ba Desportista alta kualidade ne’ebé hamorin Timor-Leste nia naran iha mundu, rejime ba ema defisiénsia no rejime sira seluk tan.

Notísia Relevante :Asesu UNTL, MAKLN propoin vaga ba veteranu nia-oan 1.300

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here