Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 11 setembru 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, hateten Governu planea ona sei oferese vaga ba oan kiak 910 atu asesu ba Universidade Nasionál Timor Lorosa’e (UNTL) iha tinan letivu 2021.

“Tinan 2021 ita hakarak rekruta estudante 910  husi kbi’it laek oan sira,  studante sira ne’e ita sei reprezenta Munisípiu 12 inklui Rejiaun Administrativa Espesiál Oé-Cusse Ambeno (RAEOA),” dehan nia iha edifísiu MESSK, Colmera sesta (11/09).

Notísia Relevante :Oan kiak sei asesu UNTL iha 2020

MESSK sei servisu hamutuk ho Ministériu Solidaridade Sosiál no Inkluzaun (MSSI), atu haree rekezitu para halo selesaun ba oan kiak sira hodi asesu universidade públiku ne’e.

Kona-ba propinas, Governante ne’e dehan oan kiak sira sei selu propinas ba UNTL hanesan ho estudante sira seluk, tanba Governu fasilita de’it prosesu atu sira bele hetan oportunidade eskola iha UNTL.

Iha parte seluk, Vise Primeiru-Ministru atuál Ministra Solidaridade Sosiál no Inkluzaun (MSSI), Armanda Berta dos Santos, informa nia parte sei halo diskusaun kona-ba rekezitu ba kandidatu asesu UNTL.

“Ita lakohi akontese hanesan estudante sira seluk ne’ebé hetan oportunidade asesu ba rejime espesiál depois hetan tiha fatin iha UNTL no IPB ikusmai eskola to’o klaran de’it sai tiha, tan ne’e presija haree didiak rekejitu sira ne’e molok implementa planu sira ne’e,” katak nia.

Entretantu, iha tersa (08/09) Ministru Ensinu Superiór Siénsia no Kultura (MESSK), Longuinhos dos Santos no Vise Primeiru-Ministru atuál Ministra Solidaridade Sosiál Inkluzaun (MSSI), Armanda Berta dos Santos, ho Ministru Asuntu Kombatente Libertasaun Nasionál (MAKLN), Júlio da Costa Sarmento “Meta Malik” asina ona nota intendimentu (MoU-sigla inglés) kona-ba planu oferese vaga ba oan kiak no veteranus nian asesu UNTL no IPB.

Notísia Relevante :Asesu UNTL, MAKLN propoin vaga ba veteranu nia-oan 1.300

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here