Diretór tékniku klube futeból sidade Dili, Karetu Dili FC, Elizeu Isaac. Imajen/Mídia FFTL

DILI, 15 outubru 2020 (TATOLI) – Diretór tékniku klube futeból  sidade Dili, Kakketu Dili FC, Elizeu Isaac, afirma katak nia jogadór sira “prontu” atu enfrenta klube jigante Boavista iha oitavu final kopa Federasaun Futeból Timor-Leste  (FFTL).

Notísia Relevante : Jogadór estranjeiru na’in tolu reforsa Karketu iha Kopa FFTL

Elizeu Isaac hateten, públiku hotu hatene ona tuir istória klube jigante Boavista seidauk manán dala ida ho Karketu, atu iha liga no jogu saida de’it. Tanba ne’e, sira prontu enfrenta malu iha jogu oitavu finál kopa FFTL  iha Estádiu Kafé Gleno, iha loron 17 outubru, tinan ne’e.

“Públiku hatene hotu ona iha kedan Liga Futeból Amadora, tasa 12 de Novembru mai to’o kopa FFTL ne’e laiha istória Boavista atu manán Karketu. Maibé, ami hateten, kopa buat seluk ida, liga buat seluk ida tanba iha kopa ne’e kuaze jogadór foun barak mak ami uza karik istória ne’e bele muda,” hateten Elizeu Isaac, hodi responde Agência Tatoli, ohin, liuhosi mensajen WhatsApp.

Nia dehan, ba kopa FFTL Karketu laiha alvu atu sai kampiaun, maibé hanesan partisipa de’it.

“Karketu iha primeiru kedan hahú kopa ami hateten ona ba públiku katak laiha alvu ba kopa ne’e. Maibé ho Maromak Nia grasa, ho preparasaun jogadór nian ne’ebé minimu tebes ami konsege ultrapasa ba oitavu finál. Ida ne’e liu mós hosi tékniku sira, Prezidente klube no sósiu sira nia apoiu mak ami konsege ultrapasa,” nia dehan.

Maski laiha alvu sai kampiaun ba kopa FFTL, epoka ne’e, maibé Karketu kontinua preparadu hodi kontra Boavista no jogu oitavu final ne’e.

“Ami mós tenke rekoñese Boavista mós agora preparadu tebes iha kopa. Ita bele dehan sira nia misaun ho ami iha kopa la hanesan, parese sira iha alvu oinsá bele manán ami. Ba ami buat ida manan sira la’ós buat foun tanba ami bele uza jogadór estranjeiru la uza estranjeiru mós Boavista ba ami la’ós buat boot, maibé joga baibain ida,” nia hatutan.

Nia husu ba adeptu Karketu nian hotu tenke halo nakonu Estádiu Gleno hodi fó suporta ba klube Matak Malirin ne’e bele manán dala-ida tan.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here