DILI,15 outubru 2020 (TATOLI)-CARE Internasionál iha Timor-Leste, kinta ne’e, selebra loron mundiál fase-liman ho tema “Ijiéne liman ba hotu-hotu” ho atividade no kampaña oioin.

Husi loron 15 fulan-outubru to’o loron 15 fulan-novembru kampaña CARE nian sei inklui kompetisaun fase-liman iha facebook liuhusi pájina LAFAEK CARE nian no iha tempu hanesan, CARE nia funsionariu hotu sei halo kompetisaun interna fase-liman nian durante loron 30.

Notísia Relevante :HNGV Komemora Loron Mundiál Fase Liman

Projetu HATUTAN, finansia husi Departamentu Agrikultura Estadu Unidu Amérika (EUA), sei lidera kompetisaun fase-liman hamutuk ho Ministériu Edukasaun, Juventude no Desportu. Kompetisaun ida ne’e sei dezafia estudante sira atu lidera no halo asaun fase-liman iha loron 30 nian laran nu’udar ábitu ida iha sira-nia eskola iha Ainaro, Ermera, Liquiça no Manatuto.

Projetu responde COVID-19 ne’ebé finansia husi Uniaun Europeia nian sei selebra loron mundial fase-liman iha eventu nivél komunidade liuhusi entrega ekipamentu ijiéne nian ba komunidade alvu ba iha Munisípiu Viqueque.

“Hanesan ita hahú daudaun kampaña ida ne’e, hau hakarak konvida CARE nia parseru sira, lider komunitária, manorin no estudante atu hamutuk ho ami iha periodu importante ida ba selebrasaun loron fase-liman nian. Ida ne’e importante tebes atu hanoin katak promosaun ba ijiéne labele konsidera de’it nu’udar eventu ida, maibé liliu nu’udar prosesu adaptivu no ajustamentu ida hodi bele apoiu liután mudansa ida sustentavel” Diretór CARE Internasionál iha Timor-Leste,  Peter Goodfellow, liuhosi komunikadu imprensa ne’ebé maka Tatoli asesu kinta ne’e.

Loron Mundiál Fase-Liman nu’udar loron advokasia globál dedikadu ne’ebé atu hasa’e konsiénsia kona-ba importansia husi liman moos, espesialmente liuhusi fase-liman ho sabaun no bee ne’ebé sulin, no hamosu mudansa permanente iha hahalok husi nivel polítika to’o asaun ne’ebé lidera husi komunidade.

CARE International iha Timor-Leste fiar katak, fase liman tenke sai responsabilidade ema hotu-hotu nian, tanba ne’e mak persiza mellora komportamentu iha nivel individu no mós iha komunidade, nune’e aktu ida ne’e sai ábitu no norma ida ba tempu naruk.

Notísia Relevante :Timor-Leste Komemora Loron Mundiál Fase Liman Ho Sabaun

Jornalista :Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here