Profesionál Saúde sira halo kampaña nasionál fase liman hodi prevene surtu COVID-19, iha areadór HNGV, kinta (14/05). Imajen Tatoli/António Gonçalves

DILI, 14 maiu 2020 (TATOLI)-Profisionál Saúde sira iha Ospitál Nasionál Guido Valadares (HNGV-sigla portugés), kinta (14/05/2020) foin komemora loron mundiál fase-liman ne’ebé mundu tomak selebra ona iha loron 05 fulan maiu 2020 liubá.

Diretóra Interina Klínika HNGV, Terlinda da Conceição Barros, hateten HNGV hamutuk ho Ministériu Saúde no Organizasaun Mundiál Saúde foin maka komemora ohin.

Iha ámbitu prevensaun COVID-19, nia sujere tebes atu sidadaun hotu tenki pratika fase liman hahú husi urbana to’o área rural hodi kombate transmisaun coronavirus iha rai-laran.

Tuir padraun ne’ebé fó husi OMS katak fase liman loloos iha etapa pruvolta 10 hodi nune’e bele livre husi virus ka kutun ruma hodi evita da’et ba ema seluk.

“Ita hatene katak pesoál saúde ne’e atende ema moras dahuluk nia labele sai fali fatin ida para atu hada’et fali infesaun tempu hanesan nia mós labele hetan fali da’et ba moras husi ema seluk,” dehan Diretóra Interina ba Jornalista sira durante komemorasaun loron mundiál fase liman iha HNGV, ohin.

Ho fase liman sei hakotu korente infesaun tanba dala barak akontese husi liman bele transmite moras ba an rasik no ema seluk.

“Entaun ita hakarak fase liman ne’e ba oin abitua ona ba ita para kombate Corona liliu evita infesaun ne’e labele iha tan no labele mosu tan foun,” nia hatutan.

Etapa fase liman ida loos maka, dahuluk habokon liman ho bee no tau sabaun natoon, daruak, kose liman laran no kotuk, datoluk, kose liman fuan no sanak sira.

Dahaat, kose liman laran ho liman fuan sira metin, dalima, kose liman fuan sir aba liman kotuk, liman karuk no hanesan ba liman parte loos nian.

“Daneen kose haleu liman fuan boot liman karuk nian, halo hanesan ba liman loos, dahitu kose liman fuan sira husi liman loos nian ba liman fuan laran liman karuk nian, halo hanesan ba liman loos, daualu fase liman ho bee, dasia hamaran liman didiak ho tisu, dasanulu hamate torneira ho tisu no ita nia liman agora moos ona,”nia esplika.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here