Komandu PNTL Dili halo apreensaun ba motorizada 52. Imajen Tatoli/Eugénio Pereira

DILI, 14 outubru 2020 (TATOLI)- Komandu Polísia Munisípiu Dili Seksaun Unidade Tránzitu Dili, durante fulan-sia (9); janeiru to’o outubru 2020, rekolla osan hamutuk $87,802,00 hosi infratór sira ne’ebé viola lei tránzitu nian hodi selu multa ka koima ba Estadu.

Notísia Relevante : Polísia halo apreensaun ba motorizada 64 no karreta ida

Komandante Polísia Unidade Tránzitu Dili, Inspetór Domingos Sarmento Gama. Imajen Tatoli/Eugénio Pereira

Komandante Polísia Unidade Tránzitu Dili, Inspetór Domingos Sarmento Gama dehan, osan ne’e rekolla hosi janeiru ho totál $3874,00, fevereiru ($3,980,00), marsu ($3,451,00), abril ($883,00), maiu (la iha operasaun), juñu ($11,125,00), jullu ($22,117,00), agostu ($14,532,00), setembru ($18,390,00), no iha loron 1 to’o loron 9 outubru, rekolla $9,450,00.

Ba jornalista sira iha Komandu PNTL, Caicoli, Dili, ohin,  Komandante Domingos dehan, iha fulan setembru 2020 ne’e, sira halo operasaun boot liu konsege halo apreensaun ba motorizada inklui karreta hamutuk 526 no halo apreensaun mós ba dokumentu inválidu hosi transporte públiku hamutuk 109.

Inspetór Domingos hatutan, ekipa Tránzitu Dili sei kontinua halo operasaun rutina hodi muda mentalidade sosiedade bainhira kondisaun transporte tenke lori dokumentu sira hanesan, KIR, Karta Kondusaun no kondisaun motór no karreta tenke di’ak hodi nafatin kumpre Lei Kódigu Estrada tuir Dekretu lei númeru 6/2003, loron 03 Abril.

Durante janeiru to’o outubru, PNTL rejista mós asidente tráfegu ne’ebé akontese iha kapitál Dili hamutuk 582 kompostu hosi kazu asidente fatal 15.

“Asidente sira ne’e maioria envolve karreta boot sira ne’ebé tula konteiner mak soke motór barak liu. Tanba ita preokupa atividade movimentu transporte tula konteiner sira ne’e tenke regula,” Inspetór Domingos hateten.

Atu evita asidente tráfegu hirak ne’e, Komandu PNTL Dili halo ona reuniaun ho Diresaun Nasionál Transporte Terrestre (DNTT) atu halo lei hodi regula karreta boot tula konteiner sira bele halo movimentu iha tempu kalan.

Halo apreensaun ba Motorizada 59

Iha  tersa kalan (13/10), ekipa halo operasaun iha kapitál Dili konsege halo apreensaun ba motorizada hamutuk unidade 59 ne’ebé la iha dokumentu.

Seksaun Tránzitu Dili rasik sei halo nafatin sira nia operasaun ba transporte públiku to’o dezembru 2020, hodi regula ema hotu- hotu uza transporte respeita regra tránzitu nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here