Segundu Komandante Polísia Munisípiu Dili, Superintendente, Euclides Belo. Imajen Tatoli/Eugénio Pereira

DILI, 28 setembru 2020 (TATOLI)- Operasaun rutina ba movimentu transporta iha Dili laran hosi Polísia Unidade Tránzitu konsege halo apreensaun ba motorizada hamutuk 64 ho karreta ida.

Notísia Relevante : Semana ne’e, Polísia rejista kazu krime 41

Karreta ho motorizada sira ne’e, polísia halo apreensaun tanba balun la iha dokumentu, balun fali dokumentu transporte nian mate  no motorista  balun la iha karta kondusaun.

Segundu Komandante Polísia Munisípiu Dili, Superintendente Euclides Belo dehan, infratór sira ne’ebé komete iha infrasaun, tuir lei selu multa ba Estadu tanba ne’e osan ne’ebé rekolla hosi infrasór sira ba kofre Estadu hamutuk $5,000,00- liu.

“Semana ne’e hahú hosi loron 19 to’o loron 25 setembru 2020, ita halo apreensaun ba motorizada hamutuk 64 inklui karreta ida ne’ebé komete iha infrasaun. Hosi motór hirak ne’e, infrasór sira simu ona billete infrasaun hodi selu osan iha banku ne’e hamutuk $5,000,00-liu,” hateten Superintendente  Euclides Belo, ohin,  ba jornalista iha Komandu PNTL, Caicoli, Dili.

Euclides hatutan, durante fulan ne’e ba oin, PNTL Dili no Departamentu Nasionál Tránzitu no Seguransa Rodoviáriu (DNTSR) sei halo operasaun maka’as hodi sosializa lei tránzitu nian inklui kontrola movimentu transporte atu labele mosu engarrafamentu no asidente tráfegu durante oras 24.

Ba motorizada sira, PNTL alerta atu kuidadu no iha kapitál Dili transporte hotu-hotu tenke kontrola velosidade másimu 20-45 kilómetru.  Tanba, iha Dili laran ne’e, karreta ne’ebé bele halai maka’as  maka Ambulánsia, Bombeiru, karru funeráriu no PNTL nian.

Tuir observasaun Agência Tatoli nian iha arredores PNTL Dili nota, daudaun ne’e motór kuaze 60-liu maka sei para nakonu iha arredores Eskuadra PNTL, Caicoli, Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here