Segundu Komandante Polísia Munisípiu Dili, Superintendente Euclides Belo. Imajen Tatoli/ Antonio Goncalves

DILI, 13 outubru 2020 (TATOLI)- Komandu Polísia Nasional Timor-Leste (PNTL) liuhosi Komandu Munisípiu Dili kompleta ona estabelesimentu Konsellu Polisiamentu Komunitária (KPK) Munisípiu Dili nian iha suku 36.

Notísia Relevante : PNTL Dili fó treinamentu ba KPK Manleuana na’in-60

Segundu Komandante PNTL Munisípiu Dili, Superintendente Euclides Belo, iha loron 8 to’o loron 9 outubru 2020, fó tan tomada  pose ba membru KPK hamutuk 75 iha Suku Beloi Villa, Postu Administrativu Atauro, Munisípiu Dili.

Ho serimónia pose ne’e, Komandu PNTL Dili kompleta ona 100% estrutura KPK iha Munisípiu Dili ho totál membru KPK hamutuk 1.625.

“Agora daudaun ita iha formasaun kontinuasaun ba membru KPK hanesan refreshing training ne’ebé maka hala’o ona iha Suku Manleuana no sei kontinua ba suku sira seluk Munisípiu Dili nian,” informa Komandante Euclides Belo liuhosi nota komunikadu imprensa ne’ebé Agência Tatoli asesu hosi Komandu Jerál PNTL, ohin.

Superintendente Euclides apela ba membru KPK ne’ebé foin simu pose atu hala’o knaar KPK nian tuir deklarasaun ne’ebé iha hodi prontu personalmente hala’o servisu hodi halo identifikasaun ba problema ne’ebé mosu iha komunidade nia leet.

Knaar KPK nian maka sai hanesan ajente hodi halo mediasaun ba kualkér disputa komunitária nian, tanba membru KPK sira hetan ona formasaun adekuadu ona ba asuntu kriminál nian.

“Knaar ne’ebé ita boot sira (membru KPK) simu hanesan vokasaun ida hodi serve ita nia komunidade ho loloos no tuir matadalan KPK ne’ebé iha. Espera katak ita sei hasoru dezafiu lubuk ida iha komunidade, maibé dezafiu ne’e labele sai obstákulu tanba ne’e ita nia prontidaun ne’e tenke tau prátika iha komunidade nia leet,” nia hateten.

Adjuntu Komandante PNTL Munisípiu Dili ne’e hatutan tan, ligadu ho knaar ne’ebé KPK simu, sei ajuda servisu PNTL nian atu halo identifikasaun ba problema iha komunidade nia leet hodi lori dame ba povu iha suku hotu- hotu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here