Serimonia Tomada Posse ba membru KPK Sira. Imajen Tatoli/ Dok

DILI, 06 outubru 2020 (TATOLI)- Komandu Polísia Munisípiu Dili, ohin, fó treinamentu ka formasaun ba membru Konsellu Polisiamentu Komunitáriu (KPK) na’in-60 hosi Suku Manleuna, Dili,  hodi implementa sira-nia programa servisu ho autoridade suku no Ofisiál Polísia Suku (OPS) atu garante paz iha ba populasaun sira.

Notísia Relevante : Komandu PNTL Sei Fasilita Formasaun Ba Membru KPK

Programa re-treinamentu ne’e lansa direita hosi Komandante PNTL Dili, Superintendente Xefe, Henrique da Costa no Segundu Komandante PNTL Dili, Superintendente, Euclides Belo, iha Komandu PNTL, Caicoli, Dili.

Komandante Henrique dehan, programa re-treinamentu ba membru KPK Manleuana nian foin maka hala’o, hafoin sira simu pose iha tinan kotuk.

“Ita halo re-treinamentu ba sira, tanba durante ne’e sira seidauk hetan oportunidade para halo re-treinamentu, entaun objetivu hosi re-treinamentu ne’e hodi fó hanoin ba sira kona-ba matéria ne’ebé mak orienta hela sira para halo servisu oinsá garante dame no moris hakmatek ba ita nia populasaun sira,” informa Komandante PNTL Henrique ba jornalista.

Programa re-treinamentu ne’e hala’o durante loron ida hodi partilla informasaun servisu KPK nian tuir lei.

Komandante PNTL Dili ne’e apresia ho servisu KPK durante ne’e kolabora di’ak ho OPS no autoridade suku tama-sai suku ida-idak buka rezolve problema no konflitu sira ne’ebé akontese hodi ajuda servisu PNTL atu garante Dili sai fatin seguru ba ema hotu.

Membru KPK labele sai autór ba krime

Iha oportunidade ne’e, Komandante Henrique mós husu atu KPK bainhira halo atuasaun ba krime ruma labele uza forsa hodi provoka fali kazu krime ruma ne’ebé bele hafo’er naran di’ak KPK nian.

“KPK labele sai fali autór ba krime ruma, tanba ne’e mak liuhosi re-treinamentu ne’e ita fó hanoin ba sira, para sira tenke sai loloos ausiliár polísia ninian ba ajuda servisu, maibé sira labele hanesan apoiu fali grupu A no B,” nia alerta.

Komandante ne’e rekoñese, durante ne’e iha oknum membru KPK  kria fali konflitu no sira-nia kazu PNTL investiga aprezenta ba Ministériu Públiku nu’udar kazu normal ida.

“Iha duni, balun ne’ebé hetan duni prosesu. Ne’e normal, tanba ita polísia rasik mós balun envolve iha krime, entaun prosesu ne’e la’o ba ema hotu,” tenik nia.

Durante formasaun ne’e, PNTL sosializa mós lei PNTL nian hodi fó koñesimentu jerál ba KPK no autoridade suku ne’ebé apoiu servisu PNTL garante paz.

Durante treinamentu ne’e, diskute mós kona-ba fasilidade ne’ebé Komandu PNTL servisu hamutuk ho parseiru dezenvolvimentu hodi ajuda farda ba KPK no fasilidade servisu seluk tan.

Daudaun ne’e, membru KPK iha Munisípiu Dili hamutuk ema na’in-1620 maka hala’o ona servisu iha suku 33 no falta suku tolu hosi Postu Administrativu Atauro nian  hamutuk  ema na’in 90-resin sei simu pose iha tempu besik.

Iha fatin hanesan, Xefe Suku Manleuana, Jacob Tilman Soares, hato’o agradese ba Komandu PNTL hodi fó treinamentu ba membru KPK sira oinsá ajuda PNTL haklaken dame ba povu.

“KPK iha fatin ne’e mós fó apoiu ba ita-nia joven sira para bele hakmatek, tanba KPK ne’ebé iha ne’e mesak sira-nia maun, belun, entaun ko’alia rona malu,” nia hateten.

Xefe suku ne’e hatutan, KPK nia prezensa ne’e di’ak, tanba bainhira iha problema ruma PNTL seidauk atua, KPK atua uluk ona, bainhira sira labele ona mak liga ba Polísia.

Kona-ba fasilidade ba KPK, parte autoridade lokál ko’alia ona ho komandu, maibé seidauk iha apoiu.

“Ami ko’alia beibeik ona ho komandante PNTL katak KPK ne’e servisu voluntáriamente, entaun se bele karik apoiu hanesan farda no Rádiu komunikasaun ba sira para sira bele uza. Tanba iha ekipa ida ne’e iha koordenadór ida, para sira bele komunika ba malu, lae uza telefone de’it, depois pulsa laiha, entaun susar,” nia preokupa.

Nia hatutan, kona-ba farda ba KPK seidauk sufisiente, tanba farda metan ne’e iha ne’e sira rasik maka sosa ho sira-nia osan no PNTL rasik seidauk fó apoiu ruma.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here