Governu lansa adezaun ba Movimentu SUN, iha salaun Ministériu Finanasa, Aitarak-laran, tersa (13/10). Imajen/Antónia Gusmão

DILI, 13 outubru 2020 (TATOLI)—VIII Governu Konstitusionál ofisialmente lansa adezaun Timor-Leste ba Movimentu Estimulasaun Nutrisaun/Scalling Up Nutrition (SUN) Movement.

Iha seremónia ne’e, Primeiru-Ministru (PM), Taur Matan Ruak, hateten Timor-Leste asume kompromisu hadi’a kondisaun moris populasaun, liu-liu ba moris di’ak iha área edukasaun, saúde, hahán, asesu ba servisu no infraestrutura bázika hodi kontribui ba dezenvolvimentu no estabilidade ekonómika país. 

“Kompromisu ne’e fó barani ba ita-nia aposta estratéjika atu kombate ki’ak no sub-nutrisaun infantíl no familiár, ne’ebé justifika ita-nia adezaun ba movimentu globál atu hadi’a nutrisaun,” dehan Xefe Governu, iha salaun Ministériu Finansa, Aitarak-laran, tersa ne’e.

Notísia Relevante: Timor-Leste sei adere ba movimentu nutrisaun estimulante ‘Sun Movement’

Ho hanoin ne’e maka Governu hakarak mobiliza rekursu umanu no finanseiru hodi harii parseria públika privada foun, atu implementa roteiru operasionál hosi Movimentu SUN iha Timor-Leste atu apoia planu no polítika nutrisaun nasionál.

“Ita fiar katak ho apoiu movimentu SUN iha Timor-Leste, sei iha posibilidade fó labarik sira moris di’ak hodi kontribui redúz índise sub-nutrisaun no mortalidade infantíl no asegura dezenvolvimentu sosiedade ida saudável no ativa ho labarik sira ne’ebé han di’ak, família prósperu no populasaun forte,” nia reforsa.

Biban ne’e, Xefe ezekutivu agradese ba Asistente Sekretáriu Jerál Nasaun Unida, Gerda Verburg, ne’ebé hanesan mós koordenadora hosi Movimentu SUN, ba apoiu hotu ne’ebé fó ona no ba konfiansa atu sai membru movimentu globál.

Movimentu SUN estabelese iha tinan 2010 ho vizaun atu forma dalan foun ida ba servisu kolaborasaun entre nasaun membru sira hodi erradika má nutrisaun no membru sira lidera atu unifika parte hotu sai forsa koletivu hodi hadi’ak nutrisaun iha idaidak ninia país.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here