Logotipu Scalling Up Nutrition “Sun Movement”. Imajen/Espesiál

DILI, 02 setembru 2020 (TATOLI)-Liuhosi reuniaun Konsellu Ministru (KM), Primeiru-Ministru (PM), Taur Matan Ruak, aprezenta projetu deliberasaun ne’ebé hetan aprovasaun, kona-ba adezaun ba movimentu nutrisaun estimulante (Scalling Up Nutrition) “Sun Movement”.

 Ministru Prezidénsia Konsellu Ministru, Fidelis Manuel Leite Magalhães, hateten movimentu ne’e kria iha setembru 2010 hosi entidade governamentál, ajénsia no grupu sira.

“Movimentu ne’e funda ho prinsípiu katak ema hotu iha direitu ba ai-han no nutrisaun di’ak, atualmente konta ho país membru hamutuk 61, ne’ebé serbisu hamutuk atu hetan métodu loloos hodi transforma no rezolve problema nutrisaun iha país idaidak,” relata Ministru Fidelis, hafoin reuniaun KM iha Palásiu Governu, kuarta ne’e.

Governante ne’e dehan, adezaun Timor-Leste ba Sun Movement, bele kontribui hadi’a vizibilidade país no permite partilla dezafíu ba má nutrisaun iha Timor-Leste no aprende ho kazu susesu sira hodi hadi’a nutrisaun.

“Adere ba rede ajénsia, instituisaun no doadór sira ne’ebé kontribui ho forma desizivu hodi hadi’a saúde no moris di’ak ba populasaun iha Timor-Leste,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here