Aeroportu Internasionál Prezidente Nicolau Lobato, Comoro, Dili. Imajen/espesiál

DILI, 13 outubru 2020 (TATOLI)–Ministru Transporte Komunikasaun, José Agostinho da Silva, hateten ekipa tékniku oras ne’e kontinua servisu maka’as hodi aselera prosesu konstrusaun Aeroportu Internasionál Prezidente Nicolau Lobato, Comoro, Dili.

“Ha’u marka audiénsia ho Primeiru Ministru atu relata serbisu ne’ebé durante ne’e Ministériu Transporte Komunikasaun hala’o. Ida maka ita-nia preparasaun konstrusaun Aeroportu Comoro ne’ebé ha’u atualiza rezultadu. Liga ba preparasaun, ekipa tékniku sira serbisu maka’as hodi aselera prosesu ne’e no buka solusaun ba populasaun ne’ebé sei hetan indemnizasaun,” tenik Ministru José Agostinho, hafoin enkontru ho Xefe Governu, iha Palásiu Governu, tersa ne’e.

Biban ne’e, governante ne’e relata katak ekipa interminiteriál ne’ebé lidera hosi Ministru Administrasaun Estatál (MAE no Ministru Justisa (MJ) maka sei haree kona-ba kestaun ne’e.

Notísia Relevante: Komisaun Interministeriál Aprezenta Planu Rekualifikasaun Aeroportu Dili ba KM

“Ekipa tékniku sira halo reuniaun ho ita-nia populasaun no autoridade lokál sira atu buka solusaun ba asuntu ne’e. Sira esforsu hamutuk ho ekipa interministeriál sira halo servisu no agora tama ona iha faze muda abitante sira iha aeroportu,” nia informa.

José Agostinho otimista konstrusaun aeroportu internasionál ne’e iha situasaun serteza nia laran, tanba antes ne’e Konsellu Ministru aprova ona planu mestre.

“Planu mestre ne’ebé Governu aprova no hatuur ona, maka sei gia ita ba prosesu konstrusaun tomak,” Ministru  subliña.

Finansiamentu ba konstrusaun, grupu traballu sei elabora no rezultadu sei aprezenta ba ekipa interministeriál inklui membru Governu ne’ebé envolve iha komisaun ne’e atubele aprezenta ba Konsellu Ministru hodi hetan apresiasaun.

“Kona-ba montante orsamentu, ita haree ekipa interministeriál sei la’o hela no ita hein de’it rezultadu. Prosesu konstrusaun bele akontese iha mandatu VIII Governu konstitusionál,” nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here