Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (23/10/2019). Imajen TATOLI/Egas Cristovão

DILI, 23 outubru 2019 (TATOLI) – Iha Konsellu Ministru (KM) kuarta ne’e, ezekutivu sira halo analiza apresentasaun husi Komisaun Interministeriál ba negosiasaun apoiu finanseiru atu halo rekualifikasaun ba Aeroportu Internasionál Prezidente Nicolau Lobato, Comoro, Dili, no mós ba planu mestre rekonstrusaun.

Ministru Estadu Prezidénsia Konsellu Ministru, Hermenegildo Augusto Cabral Pereira, informa Komisaun Interministeriál hamutuk ho International Finance Coorporration (IFC) servisu hamutuk hodi tau matan ba prosesu dezenvolvimentu Aeroportu Dili, ho Koordenadór maka José Abel.

Notísia Relevante: Governu Hahú Diskute Rekualifikasaun Aeroportu Dili

“Halo aprezentasaun ba Konsellu Ministru no orseik komisun hala’o reuniaun hodi endosa planu mestre ne’ebé IFC dezenvolve iha fulan hirak nia laran, hafoin submete ba Konsellu Ministru ninia reuniaun ohin”, nia tenik iha Palásiu Governu iha reuniaun ezekutivu.

Governante ne’e informa, aprezentasaun opsaun kompostu husi hanaruk pista aeropotu, dezenvolve terminál pasajeiru no pista ne’e sei hanaruk husi kilometru 2,1, kilometru 2,5 hafoin ba kilometru 3.

“Nune’e, aviaun boot sira bele tun iha ita-nia aeroportu no halo melloria ba terminál passajeiru ho kondisaun aviaun sira-nia no seguransa iha hotu planu ne’e. Iha mós previzaun longu termu tanba hanesan planu mestre hodi aeroportu ne’e sei dada ba mota Comoro no tasi laran”, nia subliña.

Komisaun interministeriál hamutuk ho grupu traballu sira hala’o servisu no analiza ba rekezitu tékniku, sosiál, ambientál, finanseiru no jurídiku ba opsaun rekualifikasaun.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here