Saudozu Borja da Costa. Foto: Media SEAK

DILI,13 outubru 2020 (TATOLI)-Centru Nasionál Chega hamutuk ho Grupu Juventude Lalibur Borja, iha tersa ne’e, lansa ona livru Borja da Costa iha ámbitu komemorasaun loron nasionál kultura no mós aniversáriu poeta, jornalista no ativista Francisco Borja da Costa ba dala 75 ne’ebé sei selebra iha loron 14 fulan-outubru, kuarta aban.

Francisco Borja da Costa, moris iha Fatuberliu Munisípiu Manufahi iha loron 14 fulan-outubru 1946 no mate ho tinan 30 bainhira Timor-Leste hetan invazaun husi tropa Indonézia iha loron 7 fulan-dezembru, tanba tropas parakedista sira maka oho nia (Saudozo Borja da Costa).

Notísia Relevante :Saudozu Francisco Borja da Costa nia poezia hametin espíritu patriotizmu no nasionalizmu

CNC maka apoiu fundu ho totál $500 hodi prodúz livru ho kuantidade 100 no livru ne’e iha pájina 115, ne’ebé deskreve kona-ba persepsaun saudozo Francisco Borja da Costa nian nu’udar poeta, jornalista no ativista.

Koordenadór Grupu  Lalibur Borja, Milena da Silva, hateten tempu to’o ona atu jerasaun foun sira hamutuk hodi halibur obra Borja da Costa nian tanba Borja da Costa nu’udar figura ida ne’ebé  fó dedikasaun tomak ba luta libertasaun nasionál liuhusi dalan literasia polítika revulusionária.

“Ami hakarak la’o tuir Francisco Borja nia ain fatin hodi hamoris no hametin kultura povu ida ne’e nian atu sai produtór,” nia hateten iha CNC, eis Komarka Antigu Balide Dili.

Saudozo Borja husik hela obra lubuk ida ba nasaun liuhosi poezia ho titlu maka Calai, Kadalak Sulimutu, Foho Ramelau, Patria no seluk tan.

“Eventu ida ne’e atu hanoin hikas kontribuisaun Borja  da Costa nian ba luta libertasaun rai ida,” dehan nia.

Entretantu, Grupu Lalibur Borja, sei selebra eventu kalan kulturál iha Muzeum Rejisténsia  ne’ebé sei hala’o iha loron 14 fulan-outubru ne’e iha Dili.

Notísia Relevante :SAUDOSO FRANCISCO BORJA DA COSTA 1946/1975

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here