Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu. Imajen Tatoli/Egas Cristovão

DILI, 12 outubru 2020 (TATOLI)–Governu liuhosi reuniaun Konsellu Ministru (KM) estraórdinaria segunda ne’e, aprova ona tetu agregadu no dezagregadu proposta Orsamentu Jerál Estadu (OJE) 2021 ho montante biliaun $1,895.

“Diploma ne’e aprezenta hosi Vise-Ministra Finansa, Sara Lobo Brites, ne’ebé inklui ona ho empréstimu sira,” relata Ministru Koordenadór Asuntu Ekonómiku, Joaquim Amaral, hafoin reuniaun ezekutivu iha Palásiu Governu.

Montante totál orsamentu fahe ba katogoria saláriu no vensimentu millaun $239,26, bens no servisu millaun $421,49, transferénsia públika millaun $669,91, kapitál menór millaun $61,14, no kapitál dezenvolvimentu millaun $503,20.

Notísia Relevante: Governu fixa tetu no dezagregadu OJE 2021 preliminár biliaun $1,895

Alokasaun orsamentu hodi kobre nesesidade programa no prioridade nasionál ne’ebé define ona hosi VIII Governu Konstitusionál, liuliu iha nível dezenvolvimentu kapitál sosiál no dezenvolvimentu ekonómiku ne’ebé aliñada ho medida ne’ebé tau ona iha planu rekuperasaun ekonómika, dezenvolvimentu infraestrutura bázika fundamentál, dezenvolvimentu ambientál, dezenvolvimentu institusionál no prosesu kona-ba reforma institusionál sira ne’ebé la’o hela.

Tuir kalendáriu, Governu sei submete proposta OJE 2021 ba Parlamentu Nasionál Iha loron 15 outubru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here