Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/António Gonçalves

DILI, 30 setembru 2020 (TATOLI)—Governu liuhosi reuniaun Konsellu Ministru (KM) halo aprovasaun preliminár ba tetu no dezagregadu Orsamentu Jerál Estadu (OJE) 2021 ho montante biliaun $1,895.

Diploma ne’e aprezenta hosi Vise-Ministra Finansa, Sara Lobo Brites, liuhosi projetu deliberasaun ida.

Antes ne’e, Governu define tetu ba tinan fiskál 2021 ho montante biliaun $1,6, maibé hafoin ezekutivu sira realiza reuniaun Komité Revizaun Orsamentu Polítiku (KROP), mosu proposta adisionál hosi instituisaun Estadu sira ho aumentu millaun $295.

Ministru Prezidénsia Konsellu Ministru, Fidelis Manuel Leite Magalhães, hateten valór finál ba tetu agregadu sei aprova iha reuniaun KM tuir mai.

“Ho montante totál preliminár ba tetu  dezagregadu biliaun $1,895 tuir rezultadu análize globál ba submisaun setoriál KROP ne’ebé ramata horiseik, maka permite Ministériu Finansa kontinua ho preparasaun Orsamentu Jerál Estadu tinan 2021,” tenik Ministru Fidelis hafoin reuniaun ezekutivu iha Palásiu Governu, kuarta ne’e.

Notísia Relevante: Governu define tetu OJE 2021 biliaun $1,6

Tuir governante ne’e, montante ne’ebé Governu fixa reflete ona programa prioridade ba tinan oin.

“Orsamentu ne’e reprezenta previzaun ida, entaun durante semana ida, iha ezersísiu lubuk maka hala’o iha KROP no iha diskusaun hirak ne’e tetu loloos ba nesesidade instituisaun Estadu sira nian reflete mós prioridade dezenvolvimentu no rekuperasaun ekonómika ne’ebé maka iha ein kursu, ho ida ne’e maka iha alterasaun ba tetu OJE 2021,” Portavós Governu subliña.

Tuir kalendáriu, proposta orsamentál ne’e sei entrega ba Parlamentu Nasionál iha loron 15 outubru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here