Provedora PDHJ, Jesuína Maria Ferreira Gomes, atribui sertifikadu ba formandu formasaun direitu umanu hosi unidade Polísia Militár. Imajen/Mídia PDHJ

DILI, 12  outubru 2020 (TATOLI)-Provedoria Direitu Umanu no Justisa (PDHJ) kontinua fó formasaun ba autoridade defeza sira, hodi nune’e, bele hasae koñesimentu ba atuasaun sira iha terrenu hodi kontinua respeita protesaun direitu umanu.

Notísia Relevante : PDHJ fó formasaun direitu umanu ba membru Polísia Militár

PDHJ hamutuk ho parseiru servisu hanesan Komandu Jerál FALINTIL-Forsa Defeza Timor-Leste (F-FDTL), Ministériu Defeza (MD), no Unidade Asesoria Direitu Umanu (UADU) Nasoins Unida (ONU) iha Timor-Leste kontinua realiza formasaun direitu umanu ba membru F-FDTL no Unidade Polisia Militár (PM).

Provedora PDHJ, Jesuína Maria Ferreira Gomes, iha serimónia enserramentu hateten katak, atividade formasaun ba membru F-FDTL nu’udar kompromisu ida ne’ebé estabelese liuhosi akordu ida ne’ebé realiza iha tinan 2016 ho objetivu atu hasa’e koñesimentu no kapasidade ba membru F-FDTL sira kona-bá direitu umanu.

“Ho nune’e hodi haforsa no hametin respeitu no protesaun direitu umanu iha Timor–Leste,” hateten Provedora Jesuína Maria Ferreira Gomes, liuhosi nota komunikadu ne’ebé Agência Tatoli asesu, ohin.

Nia hatutan, F-FDTL sai hanesan forsa ida ne’ebé demokrátika no responsavel, iha devér hodi respeita no proteje ema hotu nia direitu umanu, haktuir ba Konstituisaun RDTL no mós lei internasionál sira ne’ebé Estadu Timor–Leste ratifika ona.

Provedora espera katak, ho matéria hirak ne’ebé hetan hosi fasilitadór  sira bele partilla fali ba kolega sira ne’ebé sidauk hetan oportunidade ba formasaun.

Materia ba formasaun  kona-bá knaar F-FDTL no Direitu umanu, F-FDTL respeita no proteje direitus umanu iha tempu bai-bain, respeita no proteje direitu umanu  durante krize,  Estadu Exesaun Konstitusionál no mós direitu umanu relasiona ba detensaun, uza forsa no revista.  

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here