PDHJ fó formasaun direitu umanu ba membru hosi Unidade Polísia Militár. Imajen/PDHJ

DILI, 06 outubru 2020 (TATOLI)-Provedoria Direitu Umanu no Justisa (PDHJ) fó formasaun kona-ba “Kna’ar F-FDTL no Direitu Umanu” ba membru Unidade Polísia Militár (UPM) na’in-23; feto na’in-tolu no mane na’in-20.

Formasaun ne’e realiza tanba kolaborasaun entre PDHJ ho Komandu Jerál F-FDTL, Ministériu Defeza no Unidade Asesoria Direitus Umanus (UADU) ONU nian iha Timor-Leste.

Formasaun ne’e durante loron lima; hosi  loron 5 to’o loron 9 outubru 2020, ho objetivu atu hasa’e koñesimentu membru F-FDTL sira kona-ba direitus umanus hodi haforsa no hametin respeitu no protesaun ba direitu umanu iha Timor-Leste.

“Formasaun ne’e importante hodi eleva membru Polísia Militár  sira-nia koñesimentu iha area direitu umanu, hodi hatene regra no norma sira ne’ebé mak hakerek ona iha lei, tantu nasionál no mós internasionál, nune’e bele sai bukae ba membru sira bainhira hala’o sira-nia serbisu loro-loron,” hateten  Provedora Adjunta ba Area Direitu Umanu, Benícia Eriana Magno, liuhosi nota komunikadu imprensa ne’ebé Agência Tatoli, asesu, ohin.

 Formasaun ne’e kobre módulu lima ne’ebé kompostu hosi; ida), introdusaun ba direitu umanu; rua) Kna’ar F-FDTL no direitu umanu; tolu) F-FDTL no respeitu no protesaun direitu umanu iha tempu baibain; haat) F-FDTL no respeitu no protesaun direitu umanu durante krize; no lima) F-FDTL no respeitu no protesaun direitu umanu durante Estadu Exesaun Konstitusionál.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here