DILI, 12 outubru 2020 (TATOLI)-Diretór Nasionál Ensinu Tékniku Vokasionál husi Ministériu Edukasaun Juventude no Desportu, João Maupelo, hateten tuir planu estratéjiku ministériu nian ba tinan 2020 to’o 2030 sei dezenvolve maka’as eskola tékniku vokasionál intermuz rekursu umanu no fasilidades.
“Ita presiza liután atu hasa’e koñesimentu, abilidade no skill estudante sira-nian hodi haruka sira ba iha setór privadu sira atu manán esperiénsia, ita agora hamutuk ho parte kuríkulu atu haree fasilidade adekuadu apoiu daudaun ona tékniku vokasionál sira,” dehan nia ba Tatoli iha Vila Verde Dili, segunda ne’e.
Notísia Relevante :MEJD sei rekruta profesór permanente 150-resin
Kona-ba ekipamentu, nia esplika kada kursu presiza kompleta ho fasilidade hanesan laboratóriu, biblioteka, kompleta ho profesór sira ne’ebé iha kapasidade ekselente iha área espesifiku para tulun estudante sira hodi halo prátika.
Intermus rekursu umanu, daudaun ne’e iha ona profesór 1.272 maka koloka iha eskola tékniku vokasionál (TECVOC) hamutuk 58 iha munisípiu 12 inklui Rejiaun Administrativa Espesiál Oe-Cusse Ambeno (RAEOA).
Husi totál profesór ne’ebé mak iha, nia informa profesór parsiál (apoiu husi inan-aman estudante) hamutuk 268, kontratadu 286 no permanente 618.
Maibé númeru ne’e seidauk koresponde ho nesesidade eskola tékniku vokasionál sira nian tanba ne’e, MEJD iha ona planu iha 2021 sei rekruta tan profesór permanente 150-resin.
Notísia Relevante :MEJD planea reabilita sala aula 680 iha tinan oin
Jornalista : Tomé Amado
Editór :Agapito dos Santos
