Imajen TATOLI/Evaristo Soatres Martins.

DILI, 11 outubru 2020 (TATOLI)—Eis Prezidente Repúblika Kay Rala Xanana Gusmão haktuir rezultadu konferénsia nasionál iha tinan 1981 halakon supremasia no hahoris polítika unidade nasionál hafoin timoroan sira hamutuk hodi ba ukun rasik-aan.

Xanana Gusmão hateten, iha tempu administrasaun portugueza nia ókos, prosesu polítiku hahú iha 1974, ne’ebé hatudu momoos katak hasoru falta preparasaun iha aspetu hotu-hotu.

Notisia Relevante: Xanana Gusmão: “Konstituisaun dahuluk defende sistema ditadura partidu únika”

Nune’e mak timoroan bele komprende katak timoroan sira monu ba ideia ne’ebé antagóniku (kontra malu), hodi radikaliza sira-nia komportamentu no la hanoin didiak, hatudu difikuldade atu konsilia ka hakbesik entendimentu ne’ebé bele hatudu persepsaun ida-ne’ebé koletiva kona-ba interese povu nian.

Nia dehan, situasaun polítika ida-ne’ebá mak lori ba konflitu internu, ho golpe no contra-golpes, iha fulan-agostu tomak tinan 1975, buat ne’ebé fasilita tebes iha fulan sira tuir mai, ba intervensaun hosi rai-liur.

Xanana hakarak fo lembra de’it, katak, iha tempu ne’ebá, lideransa hosi partidu la sukat didi’ak kontestu ‘guerra fria’ no saida mak akontese iha rejiaun besik Timor-Leste no invazaun indonézia akontese duni, hodi hanehan povu ba susar oin-oin. Maibé, okupasaun ilegál ne’e komprova de’it, no la iha dúvida ba ida ne’e, vontade besi-asu hosi Povu atu moris livre no independente.

Xanana kontinua fó lembra, bainhira hahú funu, ne’ebé labele tahan duni tamba inimigu (batallaun barak no morteiru, kañaun ho tan aviaun funu) maka’as liu, ita lakon tiha funu, tanba inimigu serku no harahun tiha Baze Apoiu, hodi halakon kedas setór polítiku no militár.

Hosi kedas tinan 1977 to’o fins 1978 hodi, ikus liu, harahun Matebian iha 22 Novembro 1978. Tuir mai, inimigu halo persegisaun ba ita-nia forsa prinsipál no ba Diresaun Luta. Hafoin saudozo Nicolau Lobato mate, iha dezembru 1979, Diresaun Luta mohu kedas, ho membru CCF nian balun mate iha funu, balun hetan kaptura no lubuk ida mak rende ba inimigu.

Imajen TATOLI/Evaristo Soares Martins.

“Iha 1981, mak foin halo konferénsia nasionál atu reorganiza rezisténsia, hosi ne’ebé, ninia primeiru rezultadu, prátiku no ho susesu, mak implementasaun ba polítika unidade nasionál, hodi bolu timoroan tomak atu haku’ak objetivu supremu independénsia nasional nian, hodi hapara tiha polítika uluk, ne’ebé fó de’it supremasia (mesak mak manda) ba partidu ida no supremasia ba ideolojia ida-ne’ebé hanehan ka halakon ideolojia sira seluk,” Xanana Gusmão ko’alia kestaun ne’e bainhira sai oradór ba semináriu ne’ebé organiza hosi Universdade Nasionál Timor Lorosa’e (UNTL) liuhosi Fakuldade Siénsia Sosiál hala’o semiáriu ida ho tema “Com o espírito nacionalismo e patrotísmo desta comunidade académica da FCS-UNTL no âmbito de comemorar XX aniversário da UNTL sub-tema “um país, um povo e uma identidade,” iha Salaun Ian Martin INFOREPE, Balide, sábadu ne’e.

Xanana fundamenta, hosi rezultadu konferénsia nasionál ne’e mak define tiha faze foun ida ho frente tolu (3) komposta hosi  armada, polítika/klandestina no diplomátika .

Hosi rezultadu ne’e parte rezisténsia hetan duni estruturasaun, hosi ne’ebé timoroan hotu-hotu, iha rai laran ka iha-li’ur, bele hetan oportunidade atu partisipa ativamente iha esforsu komún ba libertasaun.

Xanana subliña, ho persepsaun estratéjika katak nunka se bele manán funu hosi via militar, tanba meiu hanesan kilat, kilat musan, guerrilleiru sira uitoan liu, ne’ebé kontrasta ho superioridade boot tebes hosi okupante,  ne’ebé sempre hetan apoiu hosi nasaun osidente ka rai sira-ne’ebé temi-aan hanesan demokrátiku no defensór maka’as ba direitu umanu no justisa.

Ho trabalhu polítiku no diplomátiku ne’ebé sai hanesan baze ba ita-nia esforsu ne’ebé ita dezenvolve mak provoka duni susesu ba prosesu reorganizasaun ne’e iha timoroan tomak nia rezisténsia.

Iha momentu ne’ebá, Xanana esplika, kaer tuir liña pensamentu ka hanoin estratéjiku maka iha 1983 hatán ba dezafiu atu simu ka aseita inisiativa hosi inimigu, atu halo diálogu hodi hakotu funu.

Xanana haktuir, inisiativa hosi inimigu ne’e hakarak atu alisia ka habosok Frente Armada atu simu rendisaun, hodi oferese atu labook estrutura tomak guerrilla nian, nune’e Frente Armada tama hotu iha TNI, ho promosaun  komandantes guerrilliru sira ba ofisiál superiór ka bo-boot de’it), inklui mós atu sai jenerál nu’udar prémiu ba rendisaun ne’e. Hosi Timoroan tomak nia parte iha tempu rezisténsia la buka buat seluk ida, se lae dalan ba paz.

“Ha’u orienta reuniaun ida membrus Komité Sentral nian no ami diskute no konkorda kona-ba planu ba solusaun negosiada ba konflitu hodi nune’e prepara-aan atu aprezenta ba inimigu. Pontu esensiál hanesan envolvimentu no diálogu entre potensiál rua ne’ebé interesada iha problema, Portugál, nu’udar poténsia administrante no Indonézia nu’udar poténsia okupante ho ONU nia supervizaun. Envolvimentu no diálogu entre fasoens ka grupus timorense hotu, atu lori ba realizasaun referendu, hodi nune’e permite ba povu deside rasik kona-ba ninia destinu, envolvimento hosi Nasaun Unida atu asegura prosesu ne’e bele la’o,” nia dehan.

Iha faze ida-ne’e, Xanana Gusmão hanesan líder másimu nota grupu de solidariedade hamriik barak tán ona no advoga ka defende Timor-nia kauza.

“Pesoál boa vontade ka ema laran moos no ho prinsípiu barak daudaun ona, ne’ebé jenuìnamente haku’ak ita-nia kauza no rekoñese no defende valór ne’ebé aas ba umanidade (direitu ba vida, direitu atu sai livre no independente). Nune’e mós, Povu Timor-Leste tenke hein tinan sanulu resin neen (16), atu-bele haree direitu internasionál bele kumpre. Prosesu naruk tebes, ne’ebé bele duni hakotu iha tinan 21 liu ba, ne’e mós ho raan barak ne’ebé nakfakar no maten-been barak hosi povu”, Xanana Gusmão haktuir istória luta libertasaun ne’e ba estudante FCS-UNTL.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here