Lider rezisténsia, Kay Rala Xanana Gusmão. Imajen António Gonçalves

DILI, 10 outubru 2020 (TATOLI)—Lider Nasionál, Kay Rala Xanana Gusmão, hateten konstituisaun dahuluk iha tinan 1975 defende sistema ditadura partidu únika.

Notísia Relevante: Xanana apela estudante sira halo análize krítika ba kauza situasaun polítiku

Xanana Gusmão ko’alia kestaun ne’e bainhira Universidade Nasionál Timor Lorosa’e (UNTL) liuhosi Fakuldade Siénsia Sosiál (FCS-UNTL, sigla portugés) organiza semiáriu ida ho tema “Com o espírito nacionalismo e patrotísmo desta comunidade académica da FCS-UNTL no âmbito de comemorar XX aniversário da UNTL. Semiáriu ne’e mós ho sub-tema “um país, um povo e uma identidade”.

Xanana haktuir, povu Timor ninia rezisténsia ne’ebé sekulár (tinan atus ba atus) mak define Timor-Leste nia identidade hodi luta ba ukun-aan, timoroan tomak mak halo. Povu mak reziste, ho apoia hosi frente klandestina no liuliu hosi Igreja Katólika Timorense no apoiu hosi asswa’in FALINTIL no hosi frente diplomátika hodi hamosu partisipasaun polítika ida-ne’ebé abranjente (ka luan no halibur ema hotu).

“Bainhira funu hahú, sé mak la tama iha FRETILIN, ema sira-ne’e konsidera hanesan reasionáriu no hetan dadur ou konsidera hanesan traidór ne’ebé tenke oho. FRETILIN proklama unilateralmente (mesa-mesak de’it no la iha apoiu hosi komunidade internasionál) iha 28 novembru 1975 no primeira Konstituisaun Repúblika defende sistema ditadura Partidu úniku (ka partidu ida-de’it nian) no partidu ne’e mak FRETILIN. Ita hotu rekoñese nafatin katak lideransa FRETILIN nian importante duni bainhira ita hahú funu,” Xanana Gusmão hato’o kestaun ne’e bainhira sai oradór ba semináriu ho sub-tema “Um País, Um Povo e Uma Identidade” iha INFORDEPE, Balide, sábadu ne’e.

Xanana hatutan, hafoin setór polítiku-militán monu susesivamente (ka tui-tuir malu) hahú iha fronteira Norte (Liquiça-Ermera), fronteira-súl (Bobonaro, Suai no Ainaro) tama iha sentru norte (Dili, Aileu) no sentru súl (Same), tama tan iha sentru-leste (Manatuto, no parte loromonu hosi Baucau no Viquequ) no taka iha ponta leste (Lautém no parte lorosa’e hosi Baucau no Viqueque).

Xanana relembra, hafoin baze apoiu rahun iha 1978, ho líder prinsipál sira mate no ho rendisaun membru barak hosi Komité Sentrál Fretilin (CCF-sigla portugés), ne’ebé entrega-aan no entrega tan kilat barak no guerrilleiru sira ba okupante indonéziu, konsege duni halo análize ida-ne’ebé objetiva kona-ba kauza (tansá) ba ita-nia derrota militár.

Nune’e  iha 01 marsu 1981, reorganiza fali Luta hodi kria CNRM (Konsellu Nasional da Rezisténsia Maubere) ne’ebé ikus ona sai CNRT (Konsellu Nasional da Rezisténsia Timorense), ne’ebé opta atu loke-aan ba partisipasaun polítika ne’ebé luan no boot liuhosi segmentu hotu iha sosiedade timorense hodi konsolida tiha determinasaun no vontade firme hosi povu, atu tane nafatin mehi ba ukun-rasik-aan.

Xanana dehan, ida-ne’e nu’udar konsekuénsia ida mak iha 1986 adota tiha sistema demokrátiku multipartidáriu (sistema ne’ebé loke dalan ba partidu barak).

Liutiha Referendu iha 1999, identidade timorense sai reforsada liután hosi vontade koletiva (hotu-hotu nian) atu harii kultura demokrátika no institusional ida, própria duni ba Estadu Direitu.

Ho ida ne’e, mak deside atu hala’o eleisaun dahuluk iha Timor-Leste ba Asembleia Konstituinte ne’ebé servisu hodi adota tiha Konstituisaun RDTL ne’ebé agora iha no iha Estadu Direitu tenke prevalese mak respeitu ba Konstituisau ba lei no ba instituisaun ne’ebé eleita demokràtikamente.

“Ba estudante sira-ne’ebé prezente iha-ne’e, barak liu mak sei labarik iha tempu ne’ebá. Ha’u tenke fó lembra katak ita asume (ka kaer metin) kompromisu ida-ne’e [atu harii kultura demokrátika no institusionál] mezmu ke hatene kedas ona katak ita sei liu prosesu naruk no difísil ba ‘konstrusaun Estadu’. La’ós demais atu fó lembra mós katak ita hahú iha senáriu ida-ne’ebé ita hanaran ‘terra queimada’ (katak buat hotu-hotu sunu),” Xanana esplika.

Xanana hateten, iha tempu ne’ebá laiha liu esperiénsia governativa (ka kaer ukun nian), laiha mós esperiénsia institusionál no esperiénsia demokrátika, laiha insfraestrutura bázika, laiha rekursu finanseiru no laiha mós rekursu umanu kualifikada atu fasilita (ka ajuda) servisu boot atu harii demokrasia.

Liutiha ona tinan sanulu-resin-ualu (18) maibé Timor-Leste kontinua nafatin joven (ka nurak) hanesan maiór parte estudante sira prezente iha-ne’e.

Tan ne’e, ita bele dehan katak Timor-Leste sai hanesan modelu ba demokrasia em tranzisaun, iha ne’ebé maske ho frajilidade ne’ebé liga ho ita-nia pasadu istóriku, tenke progride (ka la’o nafatin) atu harii responsabilizasaun ne’ebé boot liu no responsabilidade hosi forsas vivas (ka segmentos oin-oin) iha sosiedade laran.

“Ida-ne’e mak sai nu’udar objetivu prinsipál, iha tinan-tinan ikus ne’e, liuliu depois krize 2006 nian: atu konsolida pás no atu konstrói Estadu no Nasaun. Indiskutível (katak lalika no labele diskute) nesesidade atu fortalese (hakbiit) ita-nia Estadu Direitu. Ne’e mos, inklui kumprimentu (haktuir) dever balu atu bele reivindika (ezije) kona-ba direitu. Kuandu ema idak-idak dispostu ba asaun polítika no kuandu iha partisipasaun públika no inkluziva iha desizaun Estadu nian mak sai nu’udar forma únika atu prezerva (kaer metin) ita-nia soberania tanba soberania iha povu nia liman,” Xanana fundamenta.

Xanna fó hanoin ba timoroan hotu katak Konstituisaun Repúblika importante tebes atu asegura Estadu, prinsípiu, norma, direitu no dever sira ne’ebé hakerek iha Konstituisaun.

Xanana dehan, ne’e hotu krusiál tebes atu konsolida unidade nasional, atu konsilia ka atu kria dame, bainhira iha vontade hosi diferénsa, hosi konflitu entre grupu oin-oin ne’ebé halo parte iha sosiedade nia laran.

Tanba Estadu iha nu’udar objetivu fundamentál ida mak defende no garante demokrasia polítika no partisipasaun povu-nian iha rezolusaun ba problema nasionál nune’e bele haree órgaun soberania, iha ierárkia Estadu-nian mak sai ka loloos tenke sai duni símbolu no garante ba independénsia nasionál, ba unidade Estadu-nian no ba funsionamentu ne’ebé regulár iha instituisaun demokrátika.

Tanba ba iha órgaun ida-ne’e (Xefe Estadu) mak hatuur responsabilidade atu reprezenta Estadu no atu hala’o kontrolu ba atuasaun hosi órgaun soberania sira seluk hodi nune’e bele asegura regulár funsionamentu hosi instituisaun demokrátika hotu.

“Felizmente (sorti boot), Deputadu sira iha Assembleia Konstituinte ne’ebé deside kona-ba ita-nia Konstituisaun, hatudu duni sira-nia matenek hodi inklui prinsípiu demokrátiku ne’ebé esensiál iha ita-nia Lei Inan, hodi prezerva (asegura) katak diferensa entre grupu inklui mós entre partidu polítiku, iha ita-nia sosiedade, diferensa ne’ebé mosu tuir prosesu rejime demokrátiku ne’ebé foin mak harii no labele sai irrekonsiliável,” Xanana hateten.

Nia hatutan, demokrasia konstitusionál ida-ne’ebé tane direitu umanu, demokrasia konstitusionál ida-ne’ebé define prinsípiu separasaun podér ho énfaze iha promosaun kultura toleránsia no respeitu ba pluralizmu polítiku (demokrasia konstitusionál) ida ne’ebé determinada atu kombate forma hotu-hotu ditadura nian.

“Ikus-ikus ne’e, ha’u la haree katak valór sira-ne’ebé temi ne’e mak ita buka atu hakbiit liután no atu konsolida iha ita-nia País. Ita bele haree mós katak nu’udar konsekuénsia hosi pandemia no hosi mós resposta ne’ebé la adekuada liuhosi Governu, ne’ebé prolonga hela de’it estadu emerjénsia tuituir malu. Ha’u sente katak iha duni ona distansiamentu hosi presaun populár ne’ebé fundamentál tebes ba klase polítika,” nia dehan.

Xanana krítika Prezidente Repúblika ne’ebé hasai iha abertura ba Sesaun Lejizlativa Datolu, ba V Lejizlatura Parlamentu Nasional, iha-ne’ebé nia apela atu reforsa konseitu kona-ba sidadania partisipativa no responsável.

“Konseitu ida-ne’e duni kona-ba “sidadania partisipativa no responsável” mak autoriza no fó direitu no devér ba Fakuldade Siénsia Sosiais (sosiál) atu-bele hasai inisiativa, atu promove seminário ida-ne’e. Ida-ne’e tanba hanesan Prezidente rasik mos dehan “iha sosiedade demokrátika ho kompleksidade ne’ebé aumenta ba beibeik, hanesan ita-nian ne’e, prosesu lejitimasaun (prosesu atu fó ka hetan lejitimidade) sai hanesan ezijénsia ne’ebé obriga atu entende didi’ak se podér ne’e lejítimu no kredível duni”. Se ezijénsia, atu haree ba ne’e, laiha, ita nunka bele hatene ‘podér polítiku’ ne’ebé mosu ka hatuur hela, poder ne’e “lejítimu no kredível” ka lae,” Xanana preokupa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here