Hadau malu bola entre jogadór FIEL no Kablaki FC. Imajen/Dok.Mídia LFA

DILI, 11 outubru 2020 (TATOLI) – Treinadór Kablaki FC, João Fernandes hateten, derrota ne’ebé sira hetan tanba jogadór limitadu tebes.

Notísia Relevante : Kopa FFTL, Manan Kablaki maibé Emanuel “hela” nafatin

“Lakon ohin ne’e ami rekoñese falla iha ami duni no jogadór limitadu tebes. Jogadór balu ladún mai treinu ho razaun oioin dehan eskola, servisu no balu ba joga tiha iha futsal entaun jogadór menus mak rezultadu hatudu nune’e,” dehan João Fernandes, liuhosi konferénsia imprensa ne’ebé hala’o iha Estádiu Munisipál Dili, ohin loraik.

Nia dehan, jogu ne’ebé dirije hosi árbitru sira lao ho onestu tebes no jogadór ninian rasik mak ladún iha vontade hatudu jogu ne’ebé di’ak.

“Ami nia  jogadór barak mak la aguenta to’o minutu 90, tanba saida iha treinamentu sira mai la kompletu, dala ruma na’in hitu de’it depois balu ba joga tan tiha iha futsal,” nia tenik.

Ba oin nia sei ko’alia ho jestór klube atu foti desizaun ruma sériu hasoru jogadór sira bainhira joga ona iha kampu boot labele tan joga iha futsal tanba bele fó impaktu ba klube bainhira jogu.

Iha sorin seluk treinadór Emanuel, Januário de Almeida, fó parabéns ba nia adversáriu Kablaki, tanba maski lakon no manán ne’ebé sira hetan hanesan lisaun ida hodi prepara nafatin ho di’ak liután.

“Jogu ohin kapás loos, vitória ida ohin atu fó kontente mai ami iha jogu sira tuir mai bele hatudu di’ak liután, maski ami la konsege ultrapasa ba oitavu finál, maibé jogu sei barak no ami sei prepara aan nafatin,” hateten Januário de Almeida.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here