Kablaki FC obrigadu tenke sofre golu tolu ho nia adversáriu Emanuel FC (0-3) iha jogu kopa FFTL iha Estadiu Munisípal Dili, 10 outubru 2020. Imajen/Mídia FFTL

DILI, 11 outubru 2020 (TATOLI) – Ekipa estimadu Munisípiu Manufahi, Kablaki FC obrigadu tenke sofre golu tolu ho nia adversáriu Emanuel FC (0-3) iha jogu kopa Federasaun Futeból Timor – Leste  (FFTL) ne’ebé hala’o iha Estádiu Munisipál Dili, ohin loraik.

Maski ekipa Emanuel manán, maibé labele konsege hakat ba oitavu finál tanba hetan de’it pontu haat (4) iha grupu D. Enkuantu ekipa ne’ebé avansa ba oitavu finál mak AD SLB Laulara ho pontu 12 hanesan juara pool, Boavista FC Timor ho pontu hitu (7) hanesan runner up. Kablaki FC ho pontu tolu no Lica-Lica Lemorai ho pontu ida.

Jogu ne’ebé mak ohin ekipa rua ne’e halo hanesan jogu ikus hodi kompleta de’it oráriu hosi babak pengesian nian. Nune’e semana mai ne’e jogu oitavu finál sei hahú iha Estádiu Café Gleno.

Golu vitória Emanuel prodús hosi jogadór Jonatas Pereira (7) iha minutu ‘2, Luis Gusmão (12) ‘7 no mós iha minutu ’65.

Jogu ne’e dirije hosi árbitru Pedro Carvalho, juiz liña Filomeno da Silva, João da Costa no árbitru rezerva Angelo dos Santos konsege fó kartaun kinur ba jogadór sira ne’ebé halo erru iha kampu laran hosi Kablaki nian mak hanesan, Silvestre Castro (17) iha minutu ’49, Silvestre Gama (18) ’55, Cirilo dos Santos (19) ’76 no jogadór Emanuel nian laiha kartaun kinur no mean tanba la halo erru ruma durante jogu ne’ebé hala’o to’o minutu 90 nia laran.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here