Kay Rala Xanana Gusmão bainhira halo entrevista ho jornalista sira iha edifísiu g7+. aredores Palásiu Governu, ohin. Foto António Goncalves

DILI, 10 outubru 2020 (TATOLI)—Kay Rala Xanana Gusmão husu estudante Fakuldade Siénsia Sosiál iha Universidade Nasionál Timor Lorosa’e (FCS-UNTL, sigla portugés) atu halo análize krítiku ho onesta ba kauza situasun polítku atuál nune’e situasaun ne’e labele mosu tán iha futuru.

 Notísia Relevante: Xanana kongratula FCS-UNTL promove semináriu “Nasaun Ida, Povu Ida no Identidade Ida”

“Ha’u hakarak hasai apelu ida ba estudante sira, atu enkara (haree) prosesu ida-ne’e nu’udar prosesu dinámiku ida, iha-ne’ebé mosu susesu no erru, susesu no erru ne’ebé husu ba hotu-hotu kompreensaun ne’ebé objetiva, imparsiál no onesta, hodi nune’e bele koñese didiak kauza ka tanbasá maka akontese retrosesu (hakiduk) ne’ebé iha ka bele mosu, hodi nune’e hotu-hotu preparadu liu atu evita iha futuru”, Xanna Gusmão ko’alia kestaun ne’e bainhira sai oradór ba semináriu ne’ebé organiza hosi Universdade Nasionál Timor Lorosa’e (UNTL) liuhosi Fakuldade Siénsia Sosiál hala’o semiáriu ida ho tema “Com o espírito nacionalismo e patrotísmo desta comunidade académica da FCS-UNTL no âmbito de comemorar XX aniversário da UNTL. Semiáriu ne’e mós ho sub-tema “um país, um povo e uma identidade”, iha INFOREPE, Balide, sábadu ne’e.

Xanana subliña, futuru Timor-Leste nian iha estudante sira-nia liman, tenke prepara-an inteletuál no profisionalmente atu iha nia tempu, bele asume imi-nia responsabilidades, iha konsolidasaun estadu direitu demokrátiku no iha dezenvolvimento ba nasaun.

“Ita buka kuida ita-nia demokrasia! Ita buka kuida ita-nia Identidade”, Xanana apela ba estudante FCS-UNTL.

Xanana konsidera tema ‘Povu ida, Rai ida, Identidade ida’ ne’e forja (hakiak no haburas) hosi kedas rezisténsia iha ai-laran, liuhosi asaun ne’ebé dezenvolve atu alarga (haluan) no aprofunda (haklean) koñesimentu kona-ba rezisténsia ne’ebé kontinua iha foho no iha vila iha Timor-Leste.

Nia dehan, asaun protestu (manifestasaun) tuir mobilizasaun iha rai-li’ur, atu ezerse ka fó presaun ba governu estranjeiru, ne’ebé konivente ka taka matan hela de’it ba violasaun grave ba direitu internasionál no direitu umanu hasoru populasaun timorense hodi hakilar ho lian ida de’it “Ami lakohi sai atan! Ami hakarak sai Nasaun Soberana ida!”.

“Se ita labele husik amarguras ka terus nia todan hosi pasadu atu hanehan ita, ita mós labele husik duni situasaun atuál bele aliena ka babeur fali ita. Ita tenke iha vizaun komún no objetiva ida kona-ba futuru”, katak nia.

Nia esplika, prosesu konstrusaun nasaun sai nu’udar ideál ida nobre ka ás tebes  hanesan mós ida-ne’ebé lori ita mai independénsia.

“Ita-nia misaun agora maka atu analiza dezafius ne’ebé mosu hela iha sosiedade timor nia laran. Dezafiu sira-ne’e mak promosaun ba dezenvolvimentu sosioekonómiku Paíz nian, mak luta ba ita-nia soberania iha área marítima no ba rekursu naturál, ba to’o konsolidasaun ita-nia Estadu Direitu Demokrátiku”, dehan nia.

Xanana afrima, iha prosesu ne’e, hotu-hotu hetan responsabilidade, hotu-hotu tenke sinti-an atu partisipa ho forma atenta (katak ho atensaun didiak/la’ós arbiru de’it), ho forma responsável no konstrutiva, hodi fó valor ba prosesu ita-nia paíz tama daudaun iha faze adulta.

“Ha’u apela ba disernimentu (katak, hanoin ho didi’ak) bainhira atu sansiona ka aseita ka apoia podér polítiku ne’ebé estabelese tuir mekanismu demokrátiku. Ha’u apela ba reflesaun ka análize krítika no ba eskrutíniu ka akompaña ho didi’ak kona-ba ezersísiu ka hahalok ba poder soberanu, ne’ebé hetan abut hosi povu. Ita-nia istória kona-ba luta ba pás no ba demokrasia, ne’ebé lori to’o Konsulta Populár 1999, seidauk hotu”, dehan nia.

Eis Prezidente Repúblika husu jerasoens foun atu tane aas hahalok hosi pasadu, hodi buka hatuur reprezentatividade demokrátika ne’ebé boot liu iha órgaun podér polítiku nian, hodi garante responsabilidade boot liu no responsabilizasaun, liuhosi devér no direitu inalienável ka labele halakon atu eleje ho responsabilidade órgaun soberania nian, no hodi sai parte ativa iha dezenvolvimentu rai ida-ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here