Ekipa COVID-19 husi Ministeriu Saude halo konferensia imprensa iha Sentru Saude Vera Cruz Dili.Imajen/Felicidade Ximenes.

DILI, 10 outubru 2020 (TATOLI)-Sidadaun Pakistaun ida ho tinan 36 konfirmadu COVID-19 iha Timor-Leste, no sábadu (10/10), ne’e Ministériu Saúde izola ona nia iha Sentru Saúde Vera Cruz Dili hodi halo tratamentu saúde.

Koordenadór Jerál COVID-19 husi Ministériu Saúde, Nilton da Silva, informa pasiente ne’e ho ninia viajen husi Dubai iha loron 25 fulan-setembru 2020 ho aviaun Emirates Airlines to’o iha Kuala-Lumpur Malázia iha loron 26, no iha loron 27 husi Malázia kontinua mai Timor-Leste.

Notísia Relevante :Pasiente konfirmadu COVID-19 husi Indonézia rekopera

“Husi Malázia mai Timor-Leste iha loron 27 fulan-setembru ho  aviaun Air Timor ho totál pasajeiru ne’ebé maihusi Malázia hamutuk 150,” nia informa durante konferénsia imprensa, iha Vera Cruz, ohin.

Durante iha Timor-Leste, pasiente ne’e halo auto-kuarentena iha Otél Beach Garden  hamutuk ho ninia maluk 23 durante loron 13 ona, maibé ho kazu konfirmdu ne’e obrigatóriumente sira na’in 22 tenki  aumenta tan loron 14 halo auto-kuarentena.

“Pasiente ne’e rasik depois halo auto-kuarentena mosu sintoma hanesan COVID-19 nian tanba nia auto-kuarentena iha 27 liu loron lima nia komesa iha sintoma hanesan mear, inus been, isin manas no mós iha diarea,”dehan Nilton.

Ekipa COVID-19 husi MS hasai amostra pasiente ne’e  iha loron 6 no 9 fulan outubru mak deteta nia hetan moras coronavirus pozitivu.

“Istória pasiente ne’e durante hela iha auto-kuarentena nia iha kuartu ketak la hamutuk ho nia maluk sira seluk no ita-nia pesoál sira ne’ebé  mak kontaktu mak pesoál limpeza sira maibé ekipa vizilansia sira halo ona teste ba sira,” tenik nia.

Entretantu, dadus komulativu ezame laboratóriu to’o ohin hamutuk 8.883, rezultadu negativu 8.653, totál ema iha kuarentena obrigatóriu 195, auto-kuarentena 367, iha Dili 230, no munisípiu tolu, totál ema ne’ebé liu ona periódu loron 14 iha kuarentena no auto-kuarentena hamutuk 4.916.

Notísia Relevante :Indonéziu ida detetadu pozitivu COVID-19

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here