Ekipa COVID-19 husi Ministeriu Saude halo konferensia imprensa iha Sentru Saude Vera Cruz Dili.Imajen/Felicidade Ximenes.

DILI, 07 outobru 2020 (TATOLI)-Portavós COVID-19 husi Ministériu Saúde, Nilton da Silva, hateten pasiente pozitivu COVID-19 husi Indonézia, iha kuarta ne’e, sai ona husi sala izolamentu Sentru Saúde Vera Cruz Dili tanba ninia kondisaun rekopera ona.

Ekipa COVID-19, Ministériu Saúde nian deteta pasiente ne’e konfirmadu coronavirus iha loron 23 fulan-setembru liubá.

Notísia Relevante :Indonéziu ida detetadu pozitivu COVID-19

”Pasiente baixa iha sala izolamentu Vera Cruz  ohin konfirmadu teste dalarua negativu no teste ba dahuluk iha loron  02, outubru hatudu rezultadu negativu no iha loron 05 fulan-outubru  2020 teste  tan hatudu rezultadu negativu  no ikus iha loron 07 fulan-outubru ohin ita hateten ba públiku katak sidadaun Indonéziu  ne’e rekuperadu no konferensia imprensa hotu bele lori sai nia ba nia hela fatin,” Nia informa asuntu ne’e ba jornalista sira durante konferénsia imprensa, iha Sentru Saúde Vera Cruz, kuarta ne’e.

Sidadaun Indonézia ne’e ho idade 39, ne’ebé ho ninia viajen husi Medan, Indonézia, iha loron 11 fulan-setembru, mai iha Kupang, Nusa Tenggara Timur (NTT), iha loron 12 fulan hanesan no tama iha fronteira terrestre Motain, Batugade Munisípiu Bobonaro iha loron 13 fulan-setembru liubá.

Pasiente ne’e tama iha territóriu Timor-Leste hamutuk ho pasajeiru 168, ema na’in 166 submete ba kuarentena obrigatóriu no na’in rua auto-kuarentena iha uma.

Nilton da Silva reprezenta Ministériu Saúde apela ba komunidade no autoridade lokál sira iha área fronteira terrestre Bobonaro, Covalima no Rejiaun Administrativa Espesiál Oé-Cusse Ambeno (RAEOA) atu kontrola movimentu sidadaun sira ne’ebé ultrapasa fronteira ho dalan ilegalmente nune’e bele prevene transmisaun surtu COVID-19 iha Timor-Leste.

”Dadus loron 5 fulan-outubru 2020 totál númeru teste laboratóriu 8.306, hein rezultadu 272, totál komulativu kazu 28, rekuperadu 28, no aumenta kazu provavel haat hamutuk 32  kazu foun laiha  rezultadu negativu 8.006,’’ nia relata.

Totál ema iha kuarentena obrigatóriu to’o loron 06 fulan-outobru 2020 262, iha Dili ema 206, Munisípiu 56, auto-kuarentena 407, Dili ema 267, munisípiu 140, pasa ona loron 14 hamutuk 4.700, Dili 3.919, no munisípiu 781.

Notísia Relevante :Sidadaun indonéziu na’in ida kona tan COVID-19

Jornalista : Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here