Traballadór kompañia Handy Plastic hala’o atividade prodús saku plástiku iha Hodu-laran, sesta (09/10). Imajen Tatoli/António Gonçalves

DILI, 09 outubru 2020 (TATOLI)–Sekretaria Estadu Ambiente (SEA) no Ajénsia Nasionál Lisensiamentu Ambientál (ANLA) hamutuk ho Polísia Nasionál Timor-Leste (PNTL) munisípiu Dili, halo inspensaun ba kompañia Handy Plastic.

Sekretáriu Estadu Ambiente, Deométrio do Amaral de Carvalho, hateten inspesaun hodi hatuur dekretu-lei bandu utilizasaun saku plástiku.

Sekretáriu Estadu Ambiente, Deométrio do Amaral de Carvalho. Imajen Tatoli/António Gonçalves

“Objetivu ohin ami koopera ho Komandu Jerál PNTL, espesialmente unidade Dom Aleixo ninian atu halo inspensaun ida ba kompañia bazeia ba dekretu-lei 37/2020 kona-ba eliminasaun importasaun produsaun saku plástiku uzu úniku,” dehan Sekretáriu Estadu ne’e iha edifísiu kompañia Handy Plastic, Hudi-laran, sesta ne’e.

Antes halo inspesaun SEA fó ona notifikasaun dala-rua ba kompañia xineza maibé sira ladún koopera ho parte Governu to’o dala-tolu maka suspende atividade.

“Ami fó notifikasaun dala-rua ba sira maibé sira la to’o ba ami-nia fatin hodi halo prosesu ruma no laiha kooperasaun ho lisensiamentu ambientál, entaun ohin ami mai halo inspensaun tanba ita haree katak fatin ne’e materiál plástiku ninian barak loos, la hatene importa hosi ne’ebé no piór liu maka armajen hamutuk ho fatin produsaun ne’e kuandu akontese inséndiu ruma sei fó influénsia boot ba aredór iha fatin ne’e,” nia informa.

Notísia Relevante: Governu Aprova Dekretu-Lei Eliminasaun no Importasaun Saku Plástiku

Tanba ne’e SEA sei entrega prosesu ba órgaun kompetente hodi rezolve tuir dala legál.

Traballadór kompañia Handy Plastic hala’o atividade prodús saku plástiku iha Hodu-laran, sesta (09/10). Imajen Tatoli/António Gonçalves

“Sansaun administrativu  sei tutela ba instituisaun ne’ebé implementa polítika zero plástiku tuir dekretu-lei eliminasaun plástiku, no iha kazu ne’e Sektretaria Estadu Ambiente maka haree maibé administrativamente ami bele halo inspensaun hafoin hato’o keixa formál ba Ministériu Públiku hodi halo despeza administrativa tuir ita-nia lei haruka,” nia esplika.

Traballadór ne’ebé servisu iha kompañia ne’e hamutuk na’in-sia, kompostu hosi mane lima no feto haat.

Ba kestaun ne’e, Agência Tatoli tenta konfirma ho parte kompañia Handy Plastic maibé seidauk konsege hetan konfirmasaun

Dekretu-lei kona-ba eliminasaun no importasaun saku plástiku ne’ebé aprovadu iha Konsellu Ministru iha loron 04 marsu 2020, mensiona atu prevene no redús impaktu hosi rezíduu ba ambiente, liuliu hanesan produtu plástiku ne’ebé ho utilizasaun únika.

Kontiúdu lejizlasaun ne’e bandu halo alienasaun, importasaun no produsaun produtu plástiku naun resiklável no bandu atu halo akizisaun, distribuisaun, importasaun no produsaun ba objetu plástiku ruma.

Saku plástiku ne’ebé prodús hosi kompañia Handy Plastic. Imajen Tatoli/António Gonçalves

Aleinde ne’e, Diploma ne’e ho prinsípiu fundamentál maka hanesan prekausaun, prevensaun ba dezenvolvimentu sustentável, seguransa ambientál globál, poluidór no re-utilizasaun resiklajen valorizasaun no enerjétika.

Eliminasaun saku plástiku uzu úniku relasiona ho alternativu sira ne’ebé maka halo ona hanesan saku plástiku husi ai-farina ne’ebé empreza Heineke promove ona maibé alternativa seluk hakarak atu enkoraja negosiante ki’ik sira atubele prodús husi matéria orgánika hanesan kohe, bote, no saku sira ne’ebé bele halo ho matéria orgánika.

Lejizlasaun ne’e ninia kontiúdu to’o artigu 80, ne’ebé esplika kona-ba definisaun aspetu ne’ebé kontein iha lei-ne’e, inklui dokumentu aneksu ida kona-ba lista sira ne’ebé bele importa no prodús iha Timor-Leste, nune’e mós lista tipu plástiku 800 ne’ebé bele autoriza.

Sekretáriu Estadu Ambiente, Deométrio do Amaral de Carvalho, dada-lia ho ofisiál ALA no PNTL, iha armajen kompañia Handy Plastic, iha Hudi-laran, sesta (09/10). Imajen Tatoli/António Gonçalves

Tipu sira ne’ebé la tama lista, sei labele importa maibé kondisaun esesionál ba ema ka entidade ruma bainhira importa sei hetan taxa ba kustu báziku porsentu 30 husi valór ne’ebé entidade ne’e sosa iha merkadu.

Kona-ba lista plástiku ne’ebé bele haruka mai ne’e kímiku hotu maibé tenke kumpre prinsípiu haat hanesan matéria bele dodok iha rai bainhira soe ba rai durante fulan-tolu no bele nabeen, kutun rai sira bele han (biodegradável), bele rahun rasik iha natureza no ida importante maka la kontein materiál kímiku ne’ebé fó perigu ba saúde públika no ambiente.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here