Prezidente Repúblika, Francisco Guterres 'Lú-Olo'. Imajen Tatoli/Egas Cristovão

DILI, 09 outubru 2020 (TATOLI)-Prezidente Repúblika (PR), Francisco Guterres “Lú-Olo”, dezeja ba komemorasaun  aniversáriu Ministériu Públiku (MP)  nian ba-dala-20.

Notísia Relevante : MP iha papél importante defende ema kbiit-laek

“Hato’o dezeju ba tinan 20 Ministériu Públiku ne’ebé hatudu ona nia evolusaun no atu bele kontinua la’o ba oin nafatin hodi  kumpre ninia mandatu tuir lei  no konstituisaun,” hateten Xefe Estadu, Francisco Guterres ‘’Lú-Olo, iha nia diskursu iha ámbitu komemorasaun  aniversáriu Ministériu Públiku ba-dala-20, ohin, iha edifísiu Ministériu Finansas, Dili.

PR Lú-Olo hateten, bainhira ko’alia kona-ba  ema ida ho  tinan rua nulu ka sanulu resin ualu, bele dehan, ema ne’e joven ida, maibé ba vida instituisaun sira-nian  , sura hosi tempu UNTAET ka hosi restaurasaun Independénsia, maka bele dehan katak instituisaun sira sei labarik hela.

“Ita sei harii hela ita-nia Tribunal sira no ita-nia Ministériu Públiku. Ita presiza kompleta instituisaun sira-ne’e, hametin, haluan no halo reforma ne’ebé presiza halo,” hateten Lú-Olo.

Nia husu Prokuradór Jerál, adjuntu, majistradu, ofisial justisa, funsionáriu  hotu kontinua lori instituisaun hetan rezultadu  di’ak sira-ne’e, no hamutuk ho  superior instituisaun ne’e nian hodi hametin lideransa ba Ministériu Públiku.

“Ha’u hatene  katak instituisaun ne’e foin mak hala’o ninia knaar durante tinan-20 no sei hasoru nafatin dezafiu no ba oin sei difisil liután”.

Lú-Olo hateten, ba oin importante haforsa espesializasaun  no hatutan nafatin funsaun no servisu judisiáriu espesializadu atu ita bele enfrenta dezafiu-sira ne’ebé relasiona ho korrupsaun no krime organizadu.

“Ita iha ona kuadru legal no institusionál ba área sira-ne’e atu halo prevensaun no kombate  permanente no efetivu hasoru tipu krime ida-ne’e,” tenik Lú Olo hodi argumenta tan, importante tebes hasa’e no hakle’an kapasidade atu halo investigasaun kriminál espesializada no mós haforsa ligasaun no orientasaun hosi Prokuradór Jerál Repúblika, tuir mandatu Konstitusionál, Ministériu Públiku nian.

Nia hateten, unidade kritériu legalidade no polísia investigasaun kriminál implika orientasaun hosi Ministériu Públiku kona-ba atividade investigasaun kriminál no kooperasaun entre instituisaun ida-ne’e ho instituisaun espesializada sira seluk, hanesan Komisaun Anti-Korrupsaun no Polísia Sientífika Investigasaun Kriminál. Ba área sira ne’e, importante kontinua asegura kooperasaun internasionál di’ak  ida.

Hosi Parlamentu Nasional no Governu, importante kontinua atualiza no hadi’ak lejizlasaun  nasionál iha área luta hasoru korrupsaun no kriminalidade organizada no tranznasional, tuir konvensaun internasionál ne’ebé Estadu Timor-Leste ratifika ona.

Defeza interese Estadu nian iha área sivíl, administrativa, fiskál no kontas nian  tama mós iha área espesializada ida ne’ebé sai dezafiu prioritáriu ba Ministériu Públiku.

“Porezemplu, atu sidadaun sira fiar Estadu no sistema judisiáriu no atu instituisaun públika sira hadi’ak-aan ba beibeik,    importante tebes katak relatóriu auditoria hosi Câmara Kontas prodús konsekuénsia jurídika loloos,” hateten PR Lú Olo.

Jornalista   : Nelson de Sousa

Editór          : Francisco Simões

 

HAKEREK NO HATÁN

Please enter your comment!
Please enter your name here