DILI, 09 outubru 2020 (TATOLI)-Prezidente Repúblika (PR), Francisco Guterres “Lú-Olo”, afirma Ministériu Públiku (MP) iha papél importante hodi defende menór no ema kbiit-laek sira ne’ebé sai vítima ba violasaun iha sosiedade nia-laran.
Notísia Relevante : Lú-Olo husu majistradu sira hala’o knaar kumpre de’it lei
Xefe Estadu Timor-Leste, Francisco Guterres ‘’Lú-Olo’’ hato’o lia hirak ne’e bainhira halo lansamentu ba livru ho títulu “MINISTERIU PÚBLIKU NO PROTESAUN BA FAMÍLIA NO MENOR IHA KONTESTU TIMORENSE – HARII MODELU INTEGRADU IDA BA INTERVENSAUN’,’ ohin, iha ámbitu komemorasaun aniversáriu ba Ministériu Públiku ba dala-20 iha edifísiu Ministériu Finansas, Dili.
Lú-Olo sente ho laran haksolok MP hala’o hela ninia knaar proteje família no menór-sira, hamutuk ho instituisaun-sira seluk, liuliu ho sistema judisiáriu, hanesan tribunal-sira no MP hala’o polítika Estadu nian iha ámbitu ida-ne’e ho hanoin katak knaar proteje menór-sira no família sira sai hanesan devér ida mós ba sidadaun hotu-hotu, sosiedade sivíl no Estadu.
Nia hateten, hosi instituisaun-sira sosiedade nian, presiza foti aas liuliu mak família, nu’udar riin sosiedade nian no kondisaun ba dezenvolvimentu ema nian, tuir rekoñesimentu no definisaun iha artigu 39, n° 1, Konstituisaun Repúblika.
“Família ka família-sira, nu’udar instituisaun sosiedade nian, iha direitu no garantia konstitusionál atu simu protesaun hosi Estadu,” hateten Francisco Guterres”Lú-Olo”
Nia hateten, tanba garantia protesaun ne’e mak Konstituisaun Repúblika fó kbiit ba MP “defende menór-sira no ema kbiit-laek”.
“Kbiit fó ba Ministériu Públiku no ninia prátika halo instituisaun ne’e hamriik nu’udar majistratura protesaun ba grupu sosiál sira ne’e no grupu sosiál sira ne’e, hanesan mós sira seluk, presiza tebes instituisaun Estadu nian atu proteje sira,” nia hateten.
Ministériu Públiku iha misaun institusionál importante tebes, oinsá partíkula rekursu no instituisaun sira seluk ne’ebé bele intervein atu proteje menór- sira no família sira, atu nune’e, kontribui ba sosiedade sai livre hosi krime violénsia doméstika, família sira moris-di’ak no iha dame laran, labarik ida-idak moris ho ksolok no iha igualdade jéneru.
Nia dehan, tanba liuhosi Ministériu Públiku mak sidadaun sira iha asesu ba justisa, instituisaun ida-ne’e mós sente rasik ona ninia misaun espesiál atu proteje família no menór-sira iha kontestu sosiál ida ne’ebé violénsia doméstika aas tebes no vítima sira presiza protesaun di’ak liu.
Nia hateten, iha kontestu ida ne’e, seguransa vítima sira-nian, liuliu labarik violada sira-nian, hasoru ameasa, prezensa no lala’ok aat hosi violadór sira, tenke sai prioridade duni ba PNTL, inklui ba polísia komunitária, líder komunitáriu sira, rede apoiu ba prevensaun no kombate violénsia doméstika no sidadaun-sira ein-jerál iha devér atu partisipa mós iha sistema apoiu ba seguransa vítima sira-nian.
Jornalista : Nelson de Sousa
Editór : Francisco Simões
