Prezidente Repúblika, Francisco Guterres 'Lú-Olo' hmatuk ho Prokuradór Jerál Repúblika, José Ximenes, lansa Livro ‘ The Public Prosecution Service And The Proctection of Families And Minors In the Timorese Context", iha salaun Ministériu Finansa, Dili, 09 outubru 2020. Imajen Tatoli/Egas Cristovão

DILI, 09 outubru 2020 (TATOLI)-Prezidente Repúblika (PR), Francisco Guterres ‘’Lú-Olo’’ husu ba  majistradu ka prokuradór  sira atu hala’o kna’ar jurizdisionál tuir de’it lei no labele hasoru presaun ka interferénsia husi sesé de’it.

“Bainhira hala’o knaar jurizdisionál, liuliu majistradu-sira no operadór judisiáriu-sira, ein-jerál, labele hasoru presaun ka interferénsia hosi sesé de’it, hosi fonte  polítiku, sosiál, familiar, kulturál ka relijioza,” afirma Xefe Estadu Timor-Leste, Francisco Guterres ‘’Lú-Olo’’ iha nia diskursu iha ámbitu komemorasaun aniversáriu Ministériu Públiku (MP) ba-dala-20, ohin, iha salaun Ministériu Finansas, Dili.

Nia hateten, ho modelu konstitusionál ne’ebé Ministériu Públiku hatuur rasik, instituisaun ida-ne’e hala’o ninia knaar tuir ninia estatutu haruka,  bainhira ezekuta polítika kriminál Estadu nian, investigasaun kriminál, asaun penal no iha reprezentasaun no defeza Estadu nian.

Ministériu Públiku mós , tuir Lú-Olo, atu garante defeza ba ema  kbiit-laek, menór-sira no família sira no direitus ema hotu nian, hanesan iha ámbitu defeza ambiente no komunidade  ne’ebé hatuur iha Estatutu Ministériu Públiku nian, tuir Lei n° 11/2011, 28 setembru, ne’ebé altera Lei ° 14/2005, setembru 2005.

“Ita hotu hatene Ministériu Públiku halo ona buat barak hodi kumpre ninia obrigasaun sira. Ita hatene saída mak Ministériu Públiku halo ona kona-ba kapasitasaun ba rekursu umanus ho kolaborasaun hosi Sentru ba Formasaun Jurídika no Judisiária, hodi forma majistradu no ofisiál sira ba Ministériu Públiku. Ita hatene lala’ok Ministériu Públiku nian atu hetan ekipamentu no meius patrimoniais no tékniku, no atu harii sistema jestaun no informasaun rasik,” hateten Prezidente Repúblika  Francisco Gueterres “Lú-Olo”.

Nia hateten, planeamentu no ezekusaun lala’ok kada tinan nian no mós avaliasaun periódika no ho lideransa firme no konsistente mak lori Ministériu Públiku hala’o servisu di’ak liu no hamenus númeru kazu pendente.

“Susesu sira ne’e haksolok ita hotu, susesu sira ne’e halo ita fiar iha kapasidade Ministériu Públiku nian atu haburas-aan, nu’udar instituisaun, no oinsá bele hakaat liu dezafiu prezente no futuru, ne’ebé barak no kompleksu tebes” nia afirma tan.

Nia tenik, ba susesu sira ne’e Ministériu Públiku simu kontribuisaun hosi instituisaun-sira, lider-sira, operadór judisiáriu-sira, membru sosiedade sivíl, parseiru dezenvolvimentu no sidadaun-sira ein-jerál. La iha dúvida katak  kontribui ba susesu Ministériu Públiku nian, Prokuradór Jerál sira nomeadu hori uluk to’o ohin loron.

Jornalista   : Nelson de Sousa

Editór         : Francisco Simões

 

 

HAKEREK NO HATÁN

Please enter your comment!
Please enter your name here