Treinador AS Marca, Romão Guterres. Imajen/Mídia FFTL

DILI, 09 outubru 2020 (TATOLI) – Treinadór AS Marca, Romão Guterres, konsidera vitória ne’ebé nia ekipa hetan hodi hakat ba jogu oitavu finál kopa Federasaun Futeból Timor – Leste (FFTL) epoka ne’e, hanesan prémiu no istória boot ba sira iha sira-nia vida tomak.

Notísia Relevante : Manan FIEL FC, AS Marca hakat ba oitavu finál

“Vitoria ne’ebé ami hetan hanesan prémiu la’òs dehan ami manán tasa ruma, lae, tanba ami ekipa promovidu maibé konsege ultrapasa ba oitavu finál, entaun ida ne’e hanesan mós orgullu boot ba ami nia ekipa,” dehan Romão liuhosi konferénsia imprensa hafoin  jogu AS Marca vs FIEL FC iha Estádiu Munisipál Dili, ohin loraik.

Iha jogu ne’e, AS Marca manan nia adversáriu FIEL FC ho golu 2-1, nune’e lori AS Marca hetan tiketi hakat ba oitavu finál  hodi hasoru  Lalenok FC, ne’ebé sai hanesan adversáriu ida todan iha istória futeból Timor-Leste nian.

 “Ami sei hasoru ekipa jigante Lalenok iha oitavu finál. Entaun ami ba ne’e hanesan soke moru. Maibé hakarak lakohi dalan mak ne’e esforsu tomak ami sei halo minutu 90 mak sei termina,” Romão Guterres hateten.

Tuir nia, bainhira Lalenok hateke AS Marca hanesan ekipa ne’ebé ki’ikoan hodi hatún ekipa ne’ebé la forsa ida ne’e hanesan oportunidade ba AS Marca hodi luta kontra nune’e sorte iha bele hetan vitória.

Iha sorin seluk kapitaun FIEL António Gomes (28) relata, derrota ne’ebé sira hetan tanba durante ne’e ekipa ladún iha treinamentu ne’ebé másimu. Tanba ne’e rezultadu ikus tenke lakon.

“Ami ohin joga kapás loos, maibé tanba ami nia ekipa ladún hala’o treinamentu ho másimu ohin ami tenke lakon, maibé hanoin oportunidade seluk sei iha ami hodi kompete tanba jogu la’ós ne’e de’it,” hateten António Gomes.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here