Jogadór AS Marca. Imajen/Mídia FFTL

DILI, 09 outubru 2020 (TATOLI) – Ekipa promovidu terseira divizaun Liga Futeból Timor – Leste (LFTL) AS Marca FC hakat ona ba oitavu finál kopa FFTL epoka ne’e, hafoin manan FIEL FC ho golu 2-1 liuhosi jogu, ohin loraik, iha Estádiu Munisipál Dili.

AS Marca bele dehan, marka istória tanba foin promove hosi terseira divizaun ba segunda divizaun iha tinan 2019 ho esperiénsia ne’ebé naton  kompara ho klube seluk ne’ebé kleur ona iha primeira divizaun no segunda divizaun, maibé konsege ultrapasa iha kopa FFTL iha (babak pengesian) hodi liu kedan ba jogu oitavu finál.

Marca hamahan-aan iha grupu B hamutuk ho AS Ponta Leste, Atletico Ultramar, Nagardjo FC no FIEL FC. Hosi klube hirak-ne’e so Ponta Leste no AS Marca mak haksoit liubá oitavu finál. Enkuantu klube tolu seluk obrigadu “hakdasak” iha fatin tanba pontu la to’o no ekipa runner up ba oitavu finál mak Marca no kampiaun grupu (juara pool) mak Ponta Leste.

Jogadór sira ne’ebé kontribui boot vitória AS Marca nian iha jogu ida ne’e maka Aris Tilman (11) iha minutu ’28, Pascoal Fernandes (9) ’82. Enkuantu golu úniku FIEL hatama hosi José de Jesus (19) iha minutu ’74.

Jogu ne’e dirije hosi árbitru, Eufrásio Silva, juiz liña Ramiro Tety, Duarte Henriques no árbitru rezerva João de Jesus, konsege fó kartaun kinur ba jogadór FIEL ho jogadór AS Marca  ne’ebé komete erru iha kampu laran mak hanesan, Nilton de Carvalho (16) iha minutu ’51 hosi FIEL  no jogadór Marca mak, Pascoal Fernandes (9) iha minutu ’69, Grigorio Alves (31) ’82.

Maski hakat ona ba oitavu finál, la fasil ba AS Marca atu hakat tuir nia mehi, tanba nia tenke halo ezersísiu maka’as ka estra  hodi hatudu jogu ne’ebé di’ak  hodi kontra Lalenok United FC ne’ebé kampiaun grupu (juara pool) iha grupu A no Ponta Leste sei hasoru ekipa runner up Assalam FC.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here