Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 09 outubru 2020 (TATOLI)—Ahi mate no lakan ikus ne’e tanba Governu uza hela sistema distribuisaun eletrisidade manuál, tanba ne’e bainhira avaria iha fatin ruma tékniku sira presiza identifika lokál no han tempu.

Ba kestaun ne’e, Ministru Obra Públika, Salvador Eugênio Soares dos Reis Pires, husu públiku pasiénsia tanba ezekutivu sira halo esforsu atu moderniza sistema eletrisidade.

“Ha’u husu komunidade pasiénsia oituan tanba ne’e maka ita-nia situasaun, Governu esforsu nafatin mobiliza rekursu no prepara ba implementasaun projetu ne’ebé mak bele hadi’a sistema distribuisaun,” apela Ministru Salvador iha Palásiu Governu, sesta ne’e.

Governante ne’e rekoñese kuaze loron-loron liña eletrisidade avaria no bainhira atu detekta susar tebes tanba sei uza sistema manuál, tanba ne’e Governu sei buka meiu transforma sistema liña distribuisaun enerjia eletrisidade, nune’e tékniku sira bele detekta ho lais no normaliza hikas ahi eletrisidade ba públiku.

“Kona-ba sistema manuál, Governu anteriór investe ona sistema produsaun no transmisaun maibé infelizmente iha distribuisaun tenke presiza investe maski pakote projetu 22 mak konsege realiza ona iha Dili maibé liña balun mak seidauk tama iha pakote ne’e,” nia informa.

Notísia Relevante: MOP submete pedidu asesu fundu empréstimu atu moderniza liña eletrisidade

Investimentu longu prazu ne’ebé mak Governu liuhosi Ministériu Obra Públika (MOP) atu haree liu maka dijitalizasaun sistema distribuisaun eletrisidade.

MOP submte ona pedidu ba Ministériu Finansa hodi buka fundu empréstimu tanba presiza investimentu boot atubele dijitaliza distribuisaun Dili laran hodi nune’e fasilita tékniku sira ho fásil identifika lokál avaria no han tempu.

“Tanba agora bainhira iha avaria boot ruma sei fásil fizikamente atu identifikasaun ho lais maibé kuandu avaria ki’ik, tékniku sira tenke la’o hosi sub-estasaun Becora no avaria ne’e to’o iha Manu-meta rai-hun entaun to’o iha ne’ebá atubele buka. Kuandu avaria boot tékniku sira hetan lais entaun bele rekupera liña distribuisaun hodi fornese hikas enerjia eletrisidade ba komunidade,” nia akresenta.

Kuandu seidauk moderniza sistema maka modelu identifika avaria sei difísil.

“Kuandu avaria ki’ik sira tenke loke ahi hodi buka, kuandu sira haree ahi haksoit maka foin hatene dehan entre ai-rin sira ne’e, nune’e sira ba buka didi’ak. Tanba ne’e maka dala ruma lakan no mate fali, nune’e hela de’it,” nia dehan.

Sistema implementasaun dijitalizasaun ne’e sei iha faze negosiasaun ho parseiru sira liuhosi Ministériu Finansa no Governu planeia ona katak iha 2021 ne’e konsentra mobiliza rekursu no iha 2022 bele realiza.

Tanba Eletricidade de Timor-Leste (EDTL) transforma ona ba Empreza Públika ne’ebé ho indepedénsia administrasaun, judisiariu, no finanseira maka bele halo jestaun di’ak liu atubele fornese liña eletrisidade seguru no sustentável ba komunidade.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here