Sekretáriu Estadu na’in-tolu, kompostu hosi Sekretáriu Estadu Protesaun Sivíl (SEPS), Joaquim José Gusmão dos Reis Martins, Sekretáriu Estadu Meiu Ambiente (SEMA), Deométrio Amaral no Sekretáriu Estadu Peska (SEP), Ilídio de Araújo hamutuk ho organizasaun internasionál hosi Estadus Unidus Amerika (EUA) ACRTL kuda ai-oan mangrove iha Suku Ulmera, Postu Administrativu Bazartete, Munisípiu Liquiça, 08 outubru 2020. Imajen Tatoli/Joanico de Araújo

LIQUIÇÁ, 08 outubru 2020 (TATOLI) –Sekretáriu Estadu na’in-tolu, kompostu hosi  Sekretáriu Estadu Protesaun Sivíl (SEPS), Joaquim José Gusmão dos Reis Martins, Sekretáriu Estadu Meiu Ambiente (SEMA), Deométrio Amaral  no Sekretáriu Estadu Peska (SEP), Ilídio de Araújo hamutuk ho organizasaun internasionál hosi Estadu Unidu Amérika (EUA) ACRTL, ohin, organiza kuda ai-oan mangrove hamutuk hún 700 iha Suku Ulmera, Postu Administrativu Bazartete, Munisípiu Liquiçá.

Notísia Relevante : TL komemora loron mundiál redusaun risku dezastre

Objetivu kuda ai-oan ne’e hodi selebra loron mundiál ba redusaun risku dezastre ne’ebé ho tema “Governansa ne’ebé di’ak ba redusaun risku dezastre”, iha ne’ebé loron mundiál ne’e sei monu iha 13 outubru.

“Atividade ida ne’e hanesan atividade sekuénsia atu selebra loron mundiál risku dezastre nian. Atividade ne’e, ita komesa tiha ona iha horiseik ho  workshop nasionál, ohin, ita kuda ai-oan, aban ita sei iha atividade seluk hanesan marxa saudável no doasaun ran iha Ospitál Nasionál Guido Valadares (HNGV),” hateten Sekretáriu Estadu Protesaun Sivíl, Joaquim José Gusmão dos Reis Martins.

Iha sorin seluk Koordenadór ACRTL, Carlos Gonçalves dehan, sira hanesan parseiru ne’ebé di’ak hodi servisu hamutuk ho governu atu haree ba dezastre ne’ebé mosu no kuidadu ambiente atu sai saudavel.

“Ami parseiru ho governu atu halo atividade sira hanesan ne’e, atividade ohin ne’e ami hanesan sub-komisaun tanba atividade ne’e organiza hosi Sekretáriu Estadu na’in-tolu, oinsá mak atu komemora loron internasionál redús risku dezastre liuhosi asaun kuda mangrove hodi konserva area posteira atu sai area protejidu tan iha Ulmera,” Carlos afirma.

Entretantu, orsamentu ba realizasaun programa ne’e apoiu hosi ACRTL ho montante $2,000,00-resin. Programa refere hetan partisipasaun másimu hosi autoridade lokál Suku Ulmera, estudante Ensinu Báziku Sentrál Kasait, estudante Eskola St. Inácio de Loiola no komunidade Suku Ulmera.

Notísia Relevante : Prevensaun ba dezastre naturaís, presiza halo avaliasaun ba TL nia kapasidade

Jornalista   : Hortencio Sanchez/Joanico de Araújo

Editór        : Francisco Simões

 

HAKEREK NO HATÁN

Please enter your comment!
Please enter your name here