Sekretáriu Estadu Ambiente, Deométrio de Amaral do Carvalho. Imajen Tatoli/Egas Cristovão

DILI, 07 outubru 2020 (TATOLI) – Sekretáriu Estadu Meiu Ambiente (SEA), Demetrio Amaral hateten, komemorasaun loron mundiál importante tebes tanba dezastre hola parte ba vida umana nian, Governu, sosiedade sivíl no entidade hotu presiza halo preparasaun no leitura didi’ak kona-ba sá lakuna no kapasidade mak Timor-Leste iha hodi responde ba dezastre naturaís hanesan rai nakdoko ho sira seluk ne’ebé ho eskala boot karik akontese iha futuru no oinsá atu bele responde.

Notísia Relevante : TL komemora loron mundiál redusaun risku dezastre

Tuir nia, atu halo prevensaun Timor-Leste tenke halo avaliasaun ba nia kapasidade, tanba daudaun ne’e nia preparasaun ne’ebé iha sei dook.

“Ezemplu ita nia edifísiu sira, supermerkadu ne’ebé solda de’it barak la halo tuir nia padraun sei kolapsu hotu, tanba tuir ‘anel de fogo’ hatete katak ita frekuentamente ita bele mosu rai nakdoko iha tempu ruma ho eskala liter boot,” Sekretáriu Estadu Demetrio Amaral, iha nia intervensaun iha serimónia  komemorasaun loron mundiál redusaun risku dezastre ne’ebé hala’o, ohin, iha Salaun João Paulo II, Comoro, Dili.

Nia hateten, Timor-Leste besik hela iha zona jeográfika ne’ebé influénsia hosi presaun anin (ar) rua; súl ho Aziátiku ninian bolu tempu ida bailoron naruk tebe-tebes no tempu ida udan barak demais to’o inundasaun iha fatin-fatin (elninu no lalina).

Governante ne’e prefere presiza define estratéjia polítika nasionál redusaun risku dezastre integradu ba parte hotu iha kondisaun hodi fó resposta.

“Preparasaun iha ambiente hahú kedas hosi konseitu dezenvolvimentu planeamentu ida integradu no ba ambienta nia papél buka kapitaliza finanseira atu bele iha kbiit fó poténsia dezastre sira ne’ebé mosu,” Demetrio Amaral dehan.

Tuir ajenda ba atividade komemorasaun loron mundiál redusaun risku dezastre ba loron kinta (08/10/2020) sei kuda mós ai mangrove iha Ulmera, Liquiça no iha sesta (09/10/2020), sei kontinua ho marxa saudavel no kari ai-funan iha Palaçio do Governo no ba Cristo Rei, inklui ajenda seluk tan.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here