Estudante CSAO bainhira partisipa ezame nasionál. Imajen Jogerjo Guterres

DILI, 08 outubru 2020 (TATOLI)-Estudante finalista hamutuk 20.145husi eskola ensinu sekundáriu jerál 101 ne’ebé maka ejiste iha Timor-Leste konfirmadu ona sei partisipa iha ezame nasionál ba tinan letivu 2020 ne’ebé sei realiza iha loron 16 to’o 21 fulan-novembru 2020.

Diretora Nasionál Ensinu Sekundária Jerál Ministériu Edukasaun, Rosa Soares, informa ninia diresaun rekolla ona dadus refere no entrega ona relatóriu ne’e ba Ministru Armindo Maia no Vise Ministru António Guterres.

Notísia Relevante :Estudante 53,101 Sei Partisipa Ezame Nasionál  

“Dadus ida ne’e loos ona ita aprezenta ona ba Ministru no Vice Ministru no dadus sira ne’e mós parte kuríkulu sei prepara hodi prodúz ba modelu hanesan livru ida hodi distribui mós ba diretór no dirasaun eskolaridade sira hotu,” nia hateten ba jornalista Tatoli iha MEJD, Vila Verde Dili, kinta ne’e.

Maski Governu liuhosi Ministériu Edukasaun Juventude no Desportu deside ona kalendáriu ezame nasionál, Diretora ne’e pesimista maka estudante balun to’o agora seidauk finaliza matéria sira tanba impkatu husi COVID-19.

“Ita bele halo komparasaun tuir sasukat tinan ida ne’e ita-nia oan sira hasoru situasaun ida diferensa ho tinan kotuk entaun ita bele konsidera sei iha impaktu ba rezultadu ezame nasionál ne’ebé sei realiza iha fulan oin,” nia hatutan.

Entretantu, iha tinan 2019, tuir dadus Ministériu Edukasaun, Juventude no Desportu (MEJD), estudante ensinu báziku no sekundária hamutuk na’in 53,101 iha territóriu Timor-Leste mak partisipa iha ezame nasionál ne’ebé realiza iha loron 14-16 outubru.

Estudante sira ne’e MEJD fahe ba kategoria rua; estudante ensinu báziku estudante hamutuk 30,121 no estudante Ensinu Sekundária Jerál hamutuk 17,735 no Ensinu Sekundária Tékniku Vokasionál hamutuk estudante 5.227.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here