Estudante hasai foto hamutuk Embaixadór Korea do Súl iha Timor Leste, Chinbeom Lee.

DILI, 02 setembru 2019 (TATOLI) –Tuir dadus Ministériu Edukasaun, Juventude no Desportu (MEJD), estudante ensinu báziku no sekundária hamutuk na’in 53,101 iha territóriu Timor-Leste sei partisipa iha ezame nasionál ne’ebé sei realiza iha loron 14-16 outubru, tinan ne’e.

Estudante sira ne’e MEJD fahe ba kategoria rua; estudante ensinu báziku estudante hamutuk 30,121 no estudante Ensinu Sekundária Jerál hamutuk 17,735 no Ensinu Sekundária Tékniku Vokasionál hamutuk estudante 5.227.

Ministra Edukasaun, Juventude no Desportu (MEJD), Dulce de Jesus Soares informa katak matéria ezame nasionál nian sei prodús tuir númeru estudante ne’ebé mak iha tanba ne’e mak kooperasaun serbisu entre MEJD ho Gráfika Nasionál Timor-Leste (GNTL) hahú ona hodi prepara produsaun matéria ba estudante sira.

Ministra Edukasaun Juventude no Desportu (MEJD), Dulce de Jesus Soares. Imajen/ Fundasaun Alola

“MEJD ho Prezidente Konsellu-Ministru hamutuk halo ona kooperasaun ho Gráfika Nasionál Timor-Leste oinsá atu bele halo preparasaun ida di’ak liután hodi fasilita matéria ezame nasionál ba ita-nia estudante sira iha eskola hotu,” hateten Ministra Dulce de Jesus Soares ba jornalista sira iha edifísiu GNTL, Colmera, segunda (02/09/2019).

Ministra Dulce konsidera katak fulan setembru no outubru ne’e importante tebes ba MEJD tanba faze ida ne’ebé estudante sira tenke halo ona revizaun ba matéria ne’ebé sira hetan ona durante tinan 9 to’o tinan 12.

Tanba estudante balun tenke liuhusi faze ensinu báziku hodi hakat ba Ensinu Sekundáriu no estudante seluk tenke husi ona faze Ensinu Sekundáriu hodi tama ba ensinu Superiór.

Ne’e duni husi faze sira ne’e hotu mak obriga MEJD tenke halo preparasaun ida másimu atu nune’e estudante sira ne’ebé tuir ezame nasionál ne’e bele iha preparasaun ida másimu hahú iha setembru to’o outubru nia laran.

“Ha’u husu ba públiku sira hotu liu-liu ba inan aman sira atu kuidadu didi’ak oan sira nia saúde atu bele prepara an ho didi’ak hodi bele partisipa iha ezame nasionál ne’e ho kondisaun saúde ida di’ak”.

“Hanesan Governu durante tinan tomak halo ona esforsu hodi prepara materiál sira atu fasilita prosesu ezame ne’e bele la’o ho di’ak no mós ba profesór, ba sira atu nafatin akompaña estudante sira iha faze preparasaun ba ezame nasionál ne’e rasik,” konklui ministra.

 Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here