Treinadór Zebra FC Rogério Mok akompaña hosi jogadór na’in-rua bainhira halo konferénsia imprensa. Imajen/Mídia FFTL

DILI, 08 outubru 2020 (TATOLI) – Treinadór Zebra FC Rogério Mok  husu deskulpa ba adeptu Zebra nian hotu espesiál ba povu  Munisípiu Baucau tanba la konsege ultrapasa ba jogu oitavu finál Kopa Federasaun Futeból Timor – Leste (FFTL) époka ne’e.

Notísia Relevante : Kopa FFTL, Zebra “venceu” Santa Cruz 5-1

Nia dehan, loloos ekipa Zebra sólidu, maibé tanba de’it estrutura la hamutuk (la sólidu) hanesan uluk mak fó fallansu ba ekipa hosi jogu primeiru to’o ohin loron la konsege ultrapasa ba oin.

“Lolos ne’e ami bele avansa ba oin tanba falla hosi estrutura mak ami monu-hadeer, monu-hadeer. Se estrutura metin, ha’u sente jogadór sira mós bele iha preparasaun ne’ebé di’ak. Ami ekipa ida hosi Baucau ohin tun Dili ami joga kedan, joga hotu tenke fila kedan, entaun nia rezultadu mak hanesan ne’e, nune’e ami husu deskulpa ba adeptu sira hotu,” deklara  Rogério Mok, liuhosi konferénsia imprensa ne’ebé hala’o iha Estádiu Dili, ohin, hafoin manán Santa Cruz 5-1.

Nia relata, jogu ida ohin fó vitória hanesan lisaun ida atu estrutura no jogadór sira bele solidu nafatin, nune’e iha jogu sira tuir mai bele hatudu rezultadu di’ak.

“Jogu ida ohin hanesan lisaun ida mai ami atu hadi’a di’ak liután ba oin. Ita hotu hatene katak ba oin sei hasoru jogu Tasa 12 Novembru ,entaun ami tenke buka konsolida malu hodi rezolve dezentendimentu sira iha nivel estrutura Zebra FC,” treinadór klube favoritu sidade kulugisa ne’e hateten.

Santa Cruz konsidera derrota

Iha sorin seluk treinadór Santa Cruz, João Campos hatete, derrota ne’ebé nia ekipa hetan hanesan lisaun ida, atu nune’e, ba oin bele hadi’a di’ak liután.

Tuir nia, iha mundu futeból no jogu saida de’it iha ekipa ida manán no ida lakon ka empata laiha ekipa rua manán hotu.

“Lakon ohin ne’e triste boot mai ami, maibé ida ne’e mak jogu iha lakon no manán. Ida ne’e lisaun ida mai ami atu haree ba oin prepara di’ak liután atu labele derrota tan nune’e,” João Campos promete.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here