DILI, 08 outubru 2020 (TATOLI) – Ekipa favoritu sidade kuluguisa, Baucau, Zebra FC susesu “venceu” (membabat) nia adversáriu Santa Cruz FC ho golu 5-1 iha jogu Kopa Federasaun Futeból Timor – Leste (FFTL), ohin lokraik, iha Estádiu Munisipál Dili.
Maski ekipa ne’ebé idéntiku ho kores kuda zebra nian ne’e festa golu ba Santa Cruz FC, maibé nia la bele atu ultrapasa ba jogu oitavu finál tanba tuir pontu ne’ebé iha tabela klasifikasaun provizóriu grupu ne’e Lalenok United FC no Assalam FC mak avansa ba oin. Enkuantu Zebra FC, Santa Cruz FC no DIT labele ultrapasa tanba pontu la to’o. Tanba ne’e jogu, ohin, hanesan jogu ba ekipa rua atu kompleta de’it kalendáriu ne’ebé fó sai ona.
Golu ba vitória Zebra prodús hosi jogadór, Domingos Freitas (8) iha minutu, ’13, ’77, Domingos Peloi (15) iha minutu ’32, Antonio de Jesus (10) iha minutu ’49 no Elvis da Silva (13) iha minutu ’76.
Golu husi ekipa Santa Cruz nian “fura” husi jogadór Serafin Brito (17) iha minutu ’83. Jogu ne’e dirije hosi árbitru, Angelo dos Santos, juiz liña Carcheres dos Reis, Vicente Tilman Alves no árbitru rezerva Pedro Braga.
Iha jogu ne’e mós árbitru konsege fó kartaun kinur ba jogadór Zebra ne’ebé komete erru iha kampu laran mak hanesan, Antonio de Jesus (10) iha minutu ’39 .
Jornalista : Hortencio Sanchez
Editór : Francisco Simões
