Primeiru-Ministru, Taur Matan Ruak, akompaña ho Prokuradór Jerál Repúblika, José Ximenes no ekipa, halo vizita ba kontrusaun edifísiu Gabinete rua PGR iha Colmera, kinta (17/09/2020). Imajen Tatoli/Dok

DILI, 07 outubru 2020 (TATOLI) – Parlamentu Nasionál (PN) aprova ona iha espesialidade proposta Orsamentu Jerál Estadu (OJE) 2020 ba Prokuradoria Jerál Repúblika (PGR) ho montante $4,084,493.

Notísia Relevante : PGR husu $4,084,493 iha proposta OJE 2020

Aprovasaun ne’e ho votu hosi membru Parlamentu Nasional  ho total votu a-favor 42, kontra (0) no abstensaun 20.

“Ho nune’e orsamentu ba Prokuradoria Jerál Repúblika pasa,” deklara Prezidente Parlamentu Nasionál, Aniceto Longuinhos Guterres iha diskusaun no aprovasaun  proposta OJE 2020 iha faze espesialidade, ohin, iha plenária PN.

Proposta orsamentu PGR 2020 hamutuk $4,084,493 koloka ba saláriu vensimentu $1,903,635, bens servisu $1,609,242, kapitál dezenvolvimentu $571,616, kapitál menór ho transferénsia públika laiha.

Hosi orsamentu ne’e aloka ba Prokuradoria Jerál Repúblika $3,478,153, Prokuradoria Distritál Baucau $282,163, Prokuradoria Distritál Suai $193,916 no Prokuradoria Distritál Oe-Cusse $130,261.

Diretora Jerál PGR, Ana Maria Perreira Carvalho, hateten, proposta orsamentu 2020 PGR prevee $4,084,493 ho nia programa prioridade mak sei halo manutensaun ba iha edifísiu nasionál PGR.

Nia informa katak, orsamentu ne’e sura hosi inísiu janeiru rejime duodesimal, nune’e iha proposta OJE 2020 halo ajustamentu de’it hodi ezekuta ba fulan rua to’o iha dezembru 2020.

Tuir dokumentu ne’ebé deskreve Planu Asaun Nasionál Anuál livru 2 medida prinsipál setoriál iha 2020 PGR prioritiza reforsa kapasidade ba ezersísiu kompeténsia konstituisionais, promove dezenvolvimentu institusionál no konsolida boa governasaun jestaun institusionál, asegura jestaun prosesu krime, ho prioridade rezolusaun ba kazu krime pendente, kapasita no jere rekursu umanu, formula proposta polítika no lejizlasaun no promove boa governasaun ho jestaun institusionál iha Ministériu Públiku, fortalese kapasidade rekursu umanu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here